Bawngkawn South an champion
Cricket Association of Mizoram hnuaia II Division inelna Khaled Memorial Tournament 2020 chu nimin khan a hmawr bawkna neih a ni a, team ṭha pahnih inkhelah Bawngkawn South chuan Armed Veng chu run 89 ngawta hnehin an champion.
Durtlang Khelmualah Bawngkawn South hi ṭumvawra vannei zawkin vuak hmasak an thlang, over 47 an vuak chhungin run 225 siamin an thi kim a, target sang pangngai tak an siam. Over 50 khelh tur a nih avangin Armed Veng tan umphak theih a ni. Mahse, over 35.1 lekah run 136 siamin an thi kim.
Inelnaah hian team pakua an tel a, group pahnihah ṭhenhran an ni. An inkhelh kual hnuah group A hmahruaitu Armed Veng leh group B lama chung ber Bawngkawn South te hian nomawi an inchuh. Final khel team pahnih te hi CAM hnuaia I Division team ni turin an tling nghal bawk.
Table mawngphah luahtu Saron leh Lily Veng ten relegation playoff an khel ve thung a, Saron hian wicket riata hnehna changin Lily Veng hi an lo nekchhuak tawh a ni.
Final Thlirna Tawi
Bawngkawn South bt Armed Veng CC
Bawngkawn South lamin run 89-in hnehna an chang
Toss: Bawngkawn South lamin vuak hmasak an thlang
MoM: K. Lalṭhazuala, Bawngkawn South
Bawngkawn South: 225/10 (47)
Zothansanga 62 (58); C. Lalmuanpuia 42 (58)
Dhananjoy Bhattacharjee 47/4 (9); Nasib Rai 23/3 (10)
Armed Veng: 136/10 (35.1)
Aryan Kumar 35 (52); Dhananjoy Bhattacharjee 20 (12)
K. Lalthazuala 20/4 (10); Joseph Laltanpuia Sailo 18/2 (7)