Real Madrid ngamtu Kylian Mbappe

Champions League vawi 13 champion tawh Real Madrid chuan ngam loh an tawng - a hming chu Kylian Mbappe a ni. Spanish club chil ti put mektu France forward hian goal ṭha bik khungin Paris St-Germain chu 1-0 in hnehna a chanpui.

Lionel Messi-a penalty meuh dang theitu Thibaut Courtois tan Mbappe chu dan theih a ni lo. March 9, Nilaini hian Santiago Bernabeu Stadium-ah UCL last 16 second leg hi khelh leh a ni ang, quarterfinal lut tur zawk sawi lawk theih a la ni lo.

Mamawh chhanna

Thawhlehni zan inkhelah Mauricio Pochettino-a'n thutlukna huaisen a siam, an goal nawr kawnga mawhphurhna latu atan Mbappe a hmang. Messi pawh tlarhma laiah awm mah se pawh hnun hret a ni a, a saseh laiah kum 23 mi Mbappe vawrhchhuah a ni.

France international hian hun ṭha pawh a hmu hnem, mahse a vannei thei lo - Real Madrid keeper Thibaut Courtois chet ṭhat ni a tawng ve bawk. Mahse, dan reng theih erawh a ni lo, hun tawp hma second 45 chauh awm tawhah goal ropui a khung.

Neymar-a'n mual sira a ball chan chu a hmaa awm Mbappe tan hian a kheng zauh, box pawn a nih bakah mual sir a nih avangin hlauhawm tak niin a lang lo. Ball naran chu player pahnih karah a la tlang a, a hmaa ding defender leh Courtois dan hman lohin a khung.

Real Madrid player tan Mbappe goal khung lai chu hnai tak aṭanga thlir mai loh chi tih theih a awm lo. Spanish club hian an hnena kal tura an duh ngawih ngawih forward hi an duhna a zual a, season kal laia goal 22 khungtu hi hlawh pek hnem pawh an hreh dawn lo.

Penalty hlah

Barcelona captain hlui Messi-a'n Paris club a zawm hnuah goal khung a harsat. Poch-a'n a chhawr danah Messi hi a hmawr bawktu a ni chiah lo, a siamsaktu leh ball pass tu mawhphurhna a lak tam avangin khelmual chhunga a ṭangkaina erawh a nep chuang lo.

Argentine forward hian Mbappe tan througball ṭha bik a pe, player pali kara a ball vawrh ṭha tak chu Mbappe-a'n shot hman mah se keeper Courtois ke zawnah tak a kal; a hun ṭha neihah Messi-a'n ṭum hnih chu keeper a paltlang thei lo bawk.

Mbappe-a penalty hlawhchhuah pet turin Messi a ding chhuak a, season kal laia UCL-a a goal rukna khung ngei tura ngaih a ni. Mahse, a lira a pet chu Courtois-a'n a lo dansak. Keeper a chet ṭhat rualin Messi hian a pet kil tawk lo ve bawk a ni.

Kum 34 mi Messi-a'n European football inelna sangah hian penalty vawi 23 a pet aṭangin vawi nga a hlahna a ni. Arsenal legend Thierry Henry nen an hlah hnem ber, record duhawm tak tak karah a ṭha lo pawh a chelh tel a ngai dawn.

Real an bet

Neymar hliam a dam tawh a - Mabppe, Messi leh Marco Verratti te nen duhtawka ball an pe kual chu Real tan dan an harsa. La Liga hmahruaitu hian goal hlauhawm an nei meuh lo, minute 90 chhungin 'shot on target' pawh an nei lo!

Casemiro-a'n corner aṭanga ball kal chu goal sirah a tauh chhuak a, midfielder Toni Kroos-a'n hla deuh tak aṭanga a shot chu goal bar chungah a thlawh liam; keeper Gianluigi Donnarumma tan hna hautak an siamsak miah lo tluk a ni.

Tun season-ah away goal rule a awm lo, goal khung zat inangah khualmuala khung hnem zawk nih khan awmzia a nei lo. Carlo Ancelotti-a'n goal nawr na tak PSG lakah mahni inven a thlang - shot 21 an hmachhawn chunga goal khat chuah an chhuah kha an vannei takzet.

Italian manager hian an khelmualah chuan a naute khelh dan phung a thlak dawn, goal khung ngei ngei an mamawh. Chutih rualin yellow card hmuh vangin Casemiro leh defender Ferland Mendy ten second leg an khel thei dawn lo, thil a awlsam ngawt lo mai thei.