Old Trafford-ah an ‘siuuu’ leh ta

Cristiano Ronaldo-a'n match ruk chhung goal a khung loh hnuah Thawhlehni zan khan goal ṭha bik a khung a, Manchester United-in Old Trafford-ah Brighton & Hove Albion 2-0 in an hneh. Ralf Rangnick-a hoten point thum hlu tak an hlawhchhuah avangin Premier League table-ah palinaah an awm.

Man United tan hian Ronaldo-a'n minute 51-naah goal hmahruai a khung hnuin injury time-ah Bruno Fernandes-a'n chak nemnghehna goal a khung. Mualneitu hian goal chhuah lo mah se tlarhnung erawh a la phui lo - David de Gea a che ṭha lehpek hle.

Ze hnih nei

German manager Rangnick chuan Man United chu Scottish ziaktu lar Robert Louis Stevenson-a lehkhabu 'Strange Case of Dr Jekyll and Mr Hyde' nen a tehkhin a, tun hnaiah an khelh dan thlir chuan ze hnih an nei tih chu a chiang.

Rangnick chuan, "Dr Jekyl-a zia hi kan chhuah tam a ṭul a, Mr Hyde-a zia kan chhuah tlem a ngai," tiin a sawi a, Brighton lakah ze ṭha lo zawk 'Mr Hyde' an chhuah hmasa. Ṭan deuh chiahah Fred-a pass fimkhur loh vangin Seagulls-in chance a nei nghal a, Pascal Gross-a ball pet chu keeper De Gea zawnah a kal.

Mahse, Man United-in chance an insiam ve thuai a, Ronaldo-a'n ball lalutin mahni hma sial lo takin Jadon Sancho tan a siamsak. Sancho hian ball pe let loin amaha pet a thlang a, keeper Robert Sánchez-a'n a dang a, ball ṭha beiseitu Ronaldo leh Fernandes te an lawm lo.

Harry Maguire leh Victor Lindelof te inkawpin hna an nei ve reng a, Luke Shaw awmna lam aṭangin Brighton-in an nawr na. David de Gea-a'n ṭum hnih hna a nei a, a bik takin Jakub Moder-a ball tauh a dan phei chu a ṭha takzet.

Brighton hian goal khung theihna remchang dang pawh an nei a, Yves Bissouma-a'n a hun ṭha neih chu goal zawnah a pet lo. First half-ah goal a lut lo a, Man United aiin mikhual Seagulls an khel ṭha zawk.

An SIUUU ta

Second half-ah erawh Man United tan hlimna a rawn thleng a, lawmna rawn thlentu hi Cristiano Ronaldo a ni. Minute 51-naah Portugal captain hian box hmaah ball changin a hmaah Brighton player pathum ngawt awm mah se huai takin a khalh lut a, petna tur kua a hmuh veleh kawh zetin a pet lut - keeper Sanchez a che lo.

Brighton captain Lewis Dunk a chesual zui a, box pawnah Anthony Elanga lakah ball hloin Man United rawlthar hi a ti tlu. Referee-in yellow card chauh phawrh mah se VAR hmanga ennawn hnuah red card a pe a, minute 54-na aṭangin Brighton-in player 10-in an khelh phah.

Ronaldo a hmuhnawm zui a, amaherawhchu goal hmaah a vannei tawk lo. United no. 7 hian Fernandes-a ball vawrh luh ṭha zetin tauh mah se keeper Sanchez-a'n a dansak a, a ṭum hnihnaah erawh hnai tak aṭangin goal zawnah a tauh lo.

Chutihrualin Ronaldo hian Sanchez-a ball pass a dansak a, amah pawhin ti se goal khung theihna tur a ni chungin Fernandes a pe a, Portuguese midfielder hian keeper chauh a hmachhawn hnuah a pet goal thei lo.

Man United hi second half-ah khel ṭha hret mah se vanduai thei an la ni tho a, Brighton midfielder Moder-a'n box pawn aṭangin crossbar a pet per. Match hnuhnung pathuma goal neih sa hum thei lo Man United an ṭang tluan a, injury time-ah rang takin freekick an pet a, Fernandes-a'n halfway line pelh hret aṭanga khalh pheiin goal ṭha tak a khung.

UCL khelh inchuh

Champions League khel pha chinah Manchester United an awm a, match 25-ah point 43 an hmu. Chutihrualin Rangnick-a hote hi an dinhmun a him lo - Arsenal-in an khelh hmabak match thumah hnehna an chan vek chuan chuan point nga ngawtin an hmu tam zawk dawn.

Manchester United hi tunkar tawpah Leeds United hmachhawn turin Elland Road-ah an lenglut dawn a, Arsenal-in Brentford an mikhual dawn. Champions League beisei dang West Ham United-in harhtharna chang mek Newcastle United an hmachhawn dawn a, match hnuhnung pahniha chak lo ve ve Tottenham Hotspur-in champion lai Manchester City an tlawh bawk ang.