Mizoram hmaah Bihar

Board of Control for Cricket in India (BCCI) hnuaia state hrang hrang inelna - Ranji Trophy khelh mek a ni. Vawiin chawhma dar 9:30 hian Mizoram chuan an match hmasa ber atan Bihar an hmachhawn ang.

Jadavpur University Campus Ground, Kolkata-ah Mizoram hian inelna an hmachhawn dawn. Hripui leng kara tournament khelh tur ni mah se, hun chep tak karah Cricket Association of Mizoram (CAM) chuan team tan inbuatsaihna a siamsak.

Mizoram bowler G. Lalbiakvela chuan, "Nikum December thla khan camp kan nei hman, mahse inelna sawn a ni. Tun ṭumah hian a chawpchilh ve deuh, quarantine hnuah a hmunah ni hnih kan training hman, duhthusama inbuatsaihna chu a ni lo.

"Bihar nen hian Ranji bika kan intawn hnuhnung khan chak thei dinhmunah kan ding hman, mahse outstation player Pratika inhliam kan tuar a, kan chak lo. Tun ṭumah hian an rawn ṭang thar khawpin a rinawm," tiin Vanglaini a hrilh.

Nikum khan Mizoram hian Vijay Hazare Trophy-ah Bihar hi wicket sarihin an lo hneh tawh, team ṭha leh tawnhriat nei zawk ni mah se CAM team tan hneh theih an ni tih a lang tawh, inelna lian Ranji Trophy a nih avangin an hlau ngawt bik lo ang.

Mizoram hi plate group-ah Arunachal Pradesh, Bihar, Manipur, Nagaland leh Sikkim te nen an awm. Team tinin match thum ṭheuh an khel dawn; Mizoram hian Bihar bakah Manipur (February 24) leh Nagaland (March 3) te an hmachhawn dawn a ni.