Five star Man City-in Sporting an sawp

UEFA Champions League nomawi duha tuihal Manchester City-in Thawhlehni zan khan Estadio Jose Alvalade-ah mualneitu Sporting Libson 5-0 ngawtin an sawp. Tun season aṭangin away goal rule tih bo a ni a, heti chung hian Pep Guardiola hi quarterfinal lut tawh tlukah a ngaih theih.

UCL last 16 first leg-ah hian Man City tan Bernardo Silva-a'n goal hnih a khung a, Riyad Mahrez, Phil Foden leh Raheem Sterling ten goal khat ṭheuh an khung bawk. Second leg hi March 9, Nilaini zan hian Etihad Stadium-ah khelh leh a ni ang.

Striker nei lo

Manchester City-in nipui bazarah Sergio Aguero an chhuahtir chungin a thlakna tur striker an lalut lo a, January transfer-a an lakluh Julian Alvarez pawh a khelh mekna River Plate-ah loan hmangin a khel chhunzawm.

Sporting Libson hmachhawn tur zingah pound maktaduai 100 man Jack Grealish chu inhliam vangin a tel thei lo a, forward tiha chhal theih awm chhun Gabriel Jesus pawh inhliam vang thoin squad-ah a awm lo.

Amaherawhchu Pep hian a naute hi striker nei loin a lo rem fo tawh a, a ṭul dan ang zelin Sterling, Foden, Silva leh Kevin de Bruyne te chu 'false nine' ah a chhawr mai zel. Sporting lakah hian Foden-a'n false nine hna a chelh.

Man City hi kim lo deuh mah se an ṭhat theih dan ber tih theih deuh thoin bul ṭantute an rintlak a, right back-a awm John Stones thlengin an hna an tlin. City game ti famkim turin KDB a dam ṭha leh tawh a, Sterling leh Mahrez ten an vanglai an hmanchhoh avangin Sporting tan an ṭha mah mah.

A goal mawlh mawlh

Man City-in bul ṭan ṭha a, an hmuhnawm nghal. Minute sarihna lekah Joao Cancelo leh Bernardo Silva te thawhrah sengin Foden-a'n a chance ṭha neih chu goal-ah a pet a, keeper Antonio Adán-a'n a dang. Keeper dan per hi Kevin de Bruyne-a'n fing takin Mahrez tan a pe let a, Algerian winger hian awlsam takin goal hmahruai a khung. Goal khatna hi offside-ah ngaih ni a, amaherawhchu VAR hmanga en let hnuah goal-ah an pawm.

Minute 11-naah KDB-a through ball chu box vei lam kilah Sterling-a'n a chang a, English forward cross chu defender Matheus Reis-a'n a tauh ṭhat tawk loh avangin Stones-a'n a tauh goal teuh hle. Amaherawhchu minute ruk hnuah goal a lut leh tho a, Mahrez-a corner pet chu Rodri-a'n tauhin, ball kang chu leiah vawi khat chiah a sawt hmanin Bernardo Silva-a'n kawh zetin a volley lut.

Mual ding lamah Mahrez-a'n a thiam thil a pholang a, minute 32-naah box chhungah ball chawk kualin ṭha zetin a cross zui a, Foden-ah goal-ah a chantir. City-in goal khung belh zel tumin an nawr a, minute 44-naah box chhungah Sterling-a'n rilru fim takin ball a la let a, Bernardo Silva tan pe letin Portuguese midfielder ball pet chu Sporting defender-in dang perin goal-ah a lut.

First half-ah 4-0 a ni tawh a, second half-ah pawh Man City goal bawh a na chhunzawm. Minute 49-naah KDB ball vawrh luh chu Bernardo Silva-a'n a tauh goal a, Portuguese midfielder hian hattrick siamah inngai hman mah se a offside vangin pawm a ni lo.

Raheem Sterling-a'n goal ṭha zet a khung zui tho a, minute 58-naah English forward hian box pawn chiah aṭangin mawi zetin goal kilah a hlai lut. Darkar khat pawh tling loah Man City-in 5-0 in hma an hruai tawh a, darkar chanve dang khelh tur a la awm chungin an khung belh tawh lo thung.

Puitling leh naupang

Inkhelh hmain Sporting manager Ruben Amorim chuan, "Man City chu University zirlai ni ta se, kei chu kindergarten zirlai chauh kan la ni," tiin team pahnih inthlauh thu a sawi a, Estadio Jose Alvalade-ah team pahnih inthlauhzia pholanin a awm.

Champions League last 16 meuh ni tawh mah se puitling leh naupang inkhel ang mai a ni a, team pahnih kar a zau hle. Pep Guardiola chuan, "Ka beisei phak bak a ni a, ka lawm hle. Goal hmaah kan hriam a, goal hmaa kan ke a hmui miau chuan kan khingpui tan pawh a harsa ang. Manager erawhin result chauh ni loin kan khelh dan kan thlir a ṭul a, ka duh aiin ball kan hloh hnem deuh," tiin a sawi.

Silva a thiam

Lisbon khawpuiah Lisbon tlangval Bernardo Silva a khel ṭha a, Man City foward hian fak a hlawh. Guardiola chuan, "A bulah pawh, 'Player duhthusam i ni,' tiin ka hrilh ṭhin. Ball a chan tawh chuan player ṭha chungchuang a ni a, chutichung chuan goal khung la, min chakpui rawh tiin ka fuih ṭhin. Amah hi Benfica player hlui ni mah se an khuaah kan inkhel a, atan chuan zan duhawm bik a ni," tiin a fak.

Goal hnih khungtu Bernardo Silva chuan, "Dik taka sawi chuan first half-ah khan 4-0 a hmahruai tur em em chu kan ni loin ka hria, kan chance neih apiang khan goal-ah kan chantir a ni ber. Chutihrualin 5-0 a chak erawh a ṭha hle. Portuguese ka ni a, ka nu hi Sporting ṭantu a ni a, ka pa hi Benfica ṭantu a ni thung. Mahni khuaa goal khung hi chu a nuam," tiiin a sawi ve bawk.