Manvir Singh-a goal hnih hmangin Bagan chak

ATK Mohun Bagan striker Manvir Singh chuan Thawhlehni zan khan goal hnih a khung a, FC Goa lakah Kolkata club hi 2-0 in hnehna a chanpui.

Match 11 zet chu Mohun Bagan hian tlawm an nei ta lo a, match 15-ah point 29 an nei ta - hmahruaitu Hyderabad nen an point hmuh zat a inang a, match khatin an khel tlem zawk.

FC Goa erawh an tlawm leh tak avangin semifinal an khelh beiseina a bo a, zanin dar 7:30-a Jamshedpur leh Mumbai City FC inkhelah chak zawk an awm chuan Goa tan semifinal beiseina a bo nghal ang.

Bagan-in goal khung turin hun an mamawh rei lo. Punjabi striker pasang Manvir Singh chuan minute thumna lekah Liston Colaco-a corner aṭanga ball kal chu a tauh lut a, hmahruaina goal an khung hma hle.

Goan club-in goal an chhuah hnu lawkah chance duhawm nei mah se Alberto Noguera chuan goal-a shot aiah Jorge Ortiz tan a siamsak a, Bagan defender Tiri a inrawlh hman - a hnu lawkah Ortiz chuan a chance duhawm a hlah bawk.

Bagan tan Joni Kauko chuan chance nei ve leh mah se Goa bawk an langsar chhunzawm a, Anwar Ali-a shot chu Amrinder Singh chuan ṭha takin a lo dang - Goa-in an chance neih an chhawr lo zel a, a tawpah an tuar.

Second half ṭantirah Manvir Singh chuan Bagan goal hnihna a khung leh a, a vanneih zan ni se hattrick siam thei a ni - a penalty beisei pek a ni lo a, Colaco nena an hun ṭha neih an chhawr lo bawk.

Season duhawm tak hmangtu Colaco chuan corner aṭangin bar a pet per bawk a, hei pawh uiawm tak a ni - a tawpah erawh Bagan an chak a, league hmahruaitu ni chunga season khar an tum chu an hnaih zel.