Europa League-ah Barcelona an inlan dawn

Champions League leh Barcelona chu thil inzawm tlat emaw kan tih lai kha thawnthu mai an chang zo ta a, European football-a club hlauhawm ber pawl ni ṭhin Barcelona khan Europa League an khel dawn ta!

Europe-a club inelna sang ber dawttu Europa League knockout round chu zaninah khelh ṭan a ni dawn a, Barcelona-in zan dar 11:15-a Napoli an mikhual tur hi Champions League inkhel tur tam tak aiin ngaihven a hlawh zawk ang.

Europa League-ah hian kum danga round of 32 awm ṭhin chu tihbo a ni a, group stage-a pakhatnate chu last 16-ah an lut nghal a, pahnihna leh Champions League aṭanga tla thlaten knockout round playoff an tih chu an khel a, he inkhela chakte hian last 16 an lut ve leh ang.

Barcelona pawh hi Champions League group stage-a pathumna an nih avanga knockout round playoff khel tur an ni a, Europa League-a tum châkawm lo ber pawl Napoli an hmachhawn nghal dawn.

Mualphona

Barcelona-in Napoli nen an inhmachhawn hmain social media lamah an club museum thlalak an tarlang a, "Europa League nomawi a la awm ve lo," an ti a, an tel châk lohna tournament mah ni se an tel tak miau avangin champion ngei an tum.

Chutihrual chuan Barcelona-in duh thlang thei ni se, Europa League-a hmachhawn tura an thlan miah loh tur Napoli an tawng dawn a, nomawi mitthla mah se an beisei ang ngawt chuan a awlsam lo ang tih a chiang.

Barcelona-in an club legend Xavi an kohkir hnuah intuaithar an tum viau a, lei ba an ngah sa chungin loan an puk a, an coach hi a duh ang player lalut turin zalenna an pe bawk.

Thlasik transfer khar hnua an match hmasa berah Aletico Madrid pawh an hneh nghal a, mahse, team tenau Espanyol an inhnehtawkpui leh tawh thung - Europa League aṭanga an tlak ngat chuan Barca tan mualphona a thuah hnih khawp ang.

Napoli an ṭha

Barca fan-ten Napoli hi awlsam taka hneh tura an inngai a nih chuan an tisual ang - Serie A-ah pathumna an ni mek a, hmahruaitu AC Milan nen khelh zat inangah point hnih chauhin an hniam zawk. He team hian tlarhnungah European club liante chil tiputtu Kalidou Koulibaly leh Giovanni Di Lorenzo te an neih avangin an ngaihtuahawm lo ang tih a chiang.

Spain international midfielder Fabián Ruiz hi Barca-in an rim lai a ni a, Polish mifielder Piotr Zielinski hian tun season-ah match 28 khela goal ruk khungin assist vawi nga a nei a, Barca tana buaina thlen turin a ṭha tawk.

Tlarhmaah Victor Osimhen hian match 18-ah goal 10 khungin assist vawi thum a nei tawh a, Dries Mertens-a'n match 24-ah goal kua a khung leh der tawh a, season tawp ruala FC Toronto zawm tur Lorenzo Insigne hian Napoli a chhuahsan hmain champion a duh ang tih a chiang a, ani hian match 23-ah goal sarih khungin assist vawi ruk a nei tawh.

Napoli hian hliam vangin forward Matteo Politano, midfielder Matteo Politano leh winger Hirving Lozano te chu an chhawr theih a rinawm lo a, Manchester United aṭanga loan-a an hawh Axel Tuanzebe chu Europa League squad-ah a tel lo bawk.

Barca ve hi

Xavi enkawlna hnuaiah Barca khelh dan a danglam tih hmuh turin a awm a, zaninah Catalan club hian game mawi leh hmuhnawm phochhuah an tum ang - chutiang ti tur chuan player pawh an nei.

Tlarhmaah thlasik transfer-a an lakluh Ferran Torres, Adama Traore leh Pierre-Emerick Aubameyang te chu inkawp tura ngaih an ni a, anni chawm tura Frenkie de Jong, Sergio Busquets leh Pedri te ho an awm dawn avangin an ngaihtuahawm lo.

Tun hma angin tlarhnungah Barca an ṭha tawk tawh lo a, hei hi an talbuaina a ni. Jordi Alba-a'n a la assist ṭha thei fu a, mahse, khelh chhiat ṭum sawi tur a nei ta fo - kum 35 mi a nih ve tawh avangin Gerard Piqué pawh a ṭuan a fum ve ta deuh tih a lang.

Sergiño Dest leh Eric Garcia ten hmabak an nei êng viau a, rinrawla neih atan erawh an la nau deuh - Barca hian hliam vangin Samuel Umtiti, Ansu Fati, Sergi Roberto, Alejandro Balde, Clement Lenglet leh Memphis Depay an chhawr theih a la rinawm chiah lo a, Dani Alves chu Europa League squad-ah a tel lo.

Inkhel dang

Zanin inkhel tur ngaihven hlawh dangah Borussia Dortmund chuan zan dar 11:15-ah vek Rangers an mikhual dawn a, team pahnih player neih dan en ila, Dortmund-in Erling Haaland, Marco Reus, Julian Brandt leh Mats Hummels te ho an la neih avangin Rangers tan chuan chak turin thilmak a thlen tel a ngai.

Zanin dar 1:30-a FC Porto-in Lazio an mikhual tur pawh hi en châkawm zingah a tel a, Porto-in Liverpool lakah Luis Diaz chân mah se tun season match 31-a goal 14 leh assist 14 neitu Mehdi Taremi, match 27-a goal 13 leh assist pathum nei thei Evanilson te an la kawl a, Primeira Liga lamah point ruk ngawta an sal fan avang pawhin an inringtawk khawp ang.

Chutihrual chuan Lazio tan Ciro Immobile chuan goal a la khung reng a, match 29-ah goal 23 khungin assist pathum a nei leh der tawh - match 32-a goal riat leh assist pariat neitu Sergej Milinkovic-Savic pawh hi Porto tan chuan ngaihthah a thiang lo.

Zanin dar 1:30-a Sevilla-in Dinamo Zagreb an mikhual tur te, RB Leipzig-in Real Sociedad an mikhual tur te, Atalanta leh Olympiakos inkhel turte pawh en a châkawm vek mai!