Hriat ngai loh ECL khel tur Leicester

FA Cup champion Leicester City-in season chawhma lamah chuan Europa League an khel a, Foxes ang team tan chuan Champions League hnuai inelnaa inlan theih hi thil hlu tak a ni.

Mahse, coach Brendan Rodgers hoin beisei an phak lo a, match ruk an khelhah vawi hnih chiah an chak a, Europa League group stage-ah pathumna an ni thei hram - Europa Conference League lamah an tla thla zui.

Europa League group stage-a an match hnuhnung berah Leicester hian Napoli chu 3-2 in an ngam lo a, group C-ah pathumna an ni tih a chiang zui a, ECL khel tur Rodgers a hlim lo hle.

Foxes boss hian, "Dik taka sawi chuan eng inelna nge a nih pawh ka hre lo," tiin tun season aṭanga khelh ṭan ECL chungchang a sawi a, a hriat ngai loh ramah a naute a hruai a ngai ta - zanin dar 1:30-ah Randers an mikhual dawn.

Hello Randers

Leicester leh Randers intawnna tur hi ECL knockout round playoff a ni a, double leg inkhela chak zawk chuan ECL last 16 an lut dawn - zaninah Randers-in King Power Stadium an leng phawt ang.

Football ngaina inti zingah pawh Randers hming hre lo an awm nual ang - a awm lo hran lo. Danish club hi season hmasa khan Danish Cup-ah an champion a, hei vang hian Europa League playoff an khel.

Mahse, playoff-ah Galatasaray tawngin an chak zo lo a, ECL group stage lamah an tla thla. Group D-ah pahnihna ni zuiin ECL knockout round an lut a, Foxes an hmachhawn tur pawh hi an tan chuan lawmna tham a ni.

Randers-in player langsar tia sawi vul chuk tur an nei lo a, Foxes lakah thawhhona ṭha chu an thupui ber tur a ni ang - tun season match 19-a goal 11 leh assist pakhat neitu Stephen Odey leh match 24-a goal riat leh assist vawi hnih neitu Alhaji Kamara hi an innghahna tur an ni ang.

A hlu alawm!

Rodgers-a'n ECL a hriat loh thu sawi mah se Randers laka tlawm hi Foxes tan mualphona a ni dawn a, Liverpool coach hlui hian Danish club laka Premier League club tlawmpui hi ama career kal zel tur atan pawh a duh lo ang.

Hei chauh a ni lo - ECL-ah hian sum a tam. Foxes hian knockout round playoff-ah hnehna changin, nomawi hial chawi ta se euro maktaduai 10 chuang hlawhchhuah theihna tur a ni a, club neitu lamin nawr liam mai atan chuan an ui dawn.

Leicester tana hriat tel tur pakhat chu, Tottenham Hotspur chuan ECL hi group stage aṭangin an khel a, group G-ah French club Rennes leh Dutch club Vitesse te tluk loin, knockout round an lut thei lo.

Rodgers leh a naute tan zuam ngawt chi a ni lo ang tih a chiang a, chutihrual chuan Pathianni zanah Wolverhampton Wanderers nen league match an khelh zui dawn avangin Rodgers-a'n a a player ṭhate bench-ah a dah nual a nih pawhin a mak lo ang.