Milan khawpui ngamtu Liverpool

Champions League group stage-ah Liverpool-in vawi hnih ngawt AC Milan an hneh a, last 16-ah Inter Milan-in an ṭhenawm club tih theih loh hi tih tum mah se an tan Liverpool an u hret.

Nilaini zan khan Liverpool hian Champions League last 16 first leg-ah Inter Milan an hmachhawn a, an tlangnel sa na San Siro khelmualah 2-0 in hnehna an chang.

Reds tan Roberto Firmino leh Mohamed Salah te chuan goal khat ve ve an khung a, Inter-in a chhanletna tur an nei lo - second leg hi Anfield-a khelh tur a ni dawn a, Italian club tan quarterfinal luh a harsa tawh ang.

Liverpool rawlthar duhawm Harvey Elliott chuan Champions League-a a match hmasa ber a khel a, kum 18 leh ni 318 mi midfielder hi Reds tana Champions League-a bul ṭan thei naupang ber a ni.

Inter an vanduai?

San Siro-ah Liverpool-in bul ṭan ṭha viau mah se chance nei hlauhawm zawk chu Inter Milan tia sawi ngam a ni a, Italian club hian khawvela club ṭha ber pawl hmachhawn mah se dawi taka lo dawnsawn an tum lo.

Inter boss Simone Inzaghi-a'n inkhelh hmain a naute chu zalen taka inkhel tura a duh thu a sawi a, a sawi ang ngeiin a naute an khel a, goal hmaah erawh an hriam tawk lo - Liverpool ang team laka chance neih chhawr loh chu a pawi thui thei tih an hrechiang tawh ang.

Italian club tan hian ball pet thiam bik Hakan Calhanoglu chuan bar a pet per a, Lautaro Martinez leh Milan Skriniar ten an chance neih an chhawr ṭangkai lo bawk. First half-ah Liverpool-in beisei phak lo mah se an hun neihah erawh an hlauhawm reng a, Inter fan-ten thin thiin inkhel an en hman lo.

Sadio Mane-a'n Andy Robertson siam sak a tauh luh lohte chu uiawm a tling a, boruaka invawrh kang chunga a 'bin' goal lohte kha goal ngat se chuan goal mawi bik huanga khung tur a ni.

A goal har

Team pahnihin huaisen taka goal khung an tum reng chungin kan beisei goal kan hmu lawk lo a, hliam vanga khel ṭha pangngai tak Diogo Jota lakchhuah ngai chu Reds tan danglamna thlentu a ni.

A khelh dan leh Liverpool tana a ṭangkaizia hrethiam lo a, tam takin an sel ṭhin Firmino chuan Jota hi a thlak a, minute 75-naah Robertson-a corner aṭanga ball kal chu hmahruaina goal ni turin a tauh lut.

Inter-in thawh tum viau mah se an tho thei lo - hun tawp nan minute sarih chiah a awm tawh tihah Salah a inlar ve leh a, Egyptian forward hian Inter defender ven karah an goal hnihna a khung.

Firmino-a'n Reds tan tun season match 24 a khelh aṭanga goal riat khungin assist vawi li a nei a, Salah-a'n match 29-ah goal 24 khungin assist vawi kua a nei ta bawk.

Liverpool an thiam

A tawpa a khaikhawmna awlsam ber chu Liverpool an thiam tih hi a ni - midfield-a Fabinho, Elliott leh Thiago Alcantara te inkawp an hmuhnawm a, Andy Robertson leh Trent Alexander-Arnold te Reds goal nawr kawnga an ṭangkaizia sawi nawn a ngai lo.

Klopp-a'n tlarhmaah Salah, Jota leh Mane a inkawptir thei a, bench-ah Roberto Firmino leh Luis Diaz te bench aṭanga a luhtir theih bawk avangin Inter aiin an ṭha zawk tih chu chiang taka lang sa a ni - Diaz pawh hi a vanneih zan ni se goal khung thei a ni.

Season khat dawn hliam vanga a chawlh khan Virgil van Dijk-a'n ngai a awh leh ring lo an tam a, mahse, Dutch defender hian ngaihdan dang a nei - a thiam ngaiin a la thiam reng a, striker ṭhate tan hmachhawn a la châkawm lo reng.

Reds tana captain armband hrengtu defender-in Edin Dzeko tlang mai tawh tur anga lang a dan hmante chu pui tak a ni a, an talbuai lai ber pawha a ṭhiante a au phur reng peihte kha hruaitu rilru pu mi zia a ni - a dinpui Ibrahima Konate fak loh a rem lo a, French defender pawh hian a khel ṭha takzet.

Hmabak a êng?

Liverpool-in inelna hrang hrangah match sarih zet chu a zawnin hnehna an chang ta a, inelna an hmachhawn paliah champion turin beiseina an la nei vek bawk - hei lo liam a awm chuang em ni?

Reds hian Inrinni zanah Premier League khel turin Norwich City an mikhual ang a, Nilaini zanah Leeds United an mikhual bawk ang - he inkhela an chak ve ve chuan Inrinni zanah Manchester City (vs Tottenham Hotspur) chak ta pawh ni se point ruk chauhin an thlau ang.

Liverpool hian City an la hmachhawn dawn bawk a, Premier League-ah pawh champion beiseina a la nung tihna a ni - league match hnih an khelh zawhah hian League Cup final an khel dawn bawk.

February 27-a League Cup final-ah hian Chelsea an mikhual dawn a, March 8-a second leg khel tura Inter Milan an mikhual meuh chuan Jurgen Klopp leh a nauten nomawi pakhat chu an lo chawi fel tawh mai thei.