Fight hmachhawn ka châk tawh - NT Biakkima

Mizo boxer lar NT Lalbiakkima chuan IBA intercontinental title a humhim hnua a vawi khat nan fight a hmachhawn leh dawn ta a, February 26 khian Dubai khawpuiah Pakistan boxer Fida Muhammad nen an inhnek ang.

NT Biakkima chuan, "Inhnek turin ka inpeih tawh. Rim takin ka thawk reng a, ei leh in thlengin mumal takin ruahmanna kan siam a, fight hmachhawn ka châk tawh takzet a ni," a ti a, a inpeih tawh thu Vanglaini a hrilh.

Siaha boxer hian professional boxing a luhchilh hnuah vawi thum fight a hmachhawn tawh a, round hnih an khelh zawh hmain a khingpuite a knockout vek - a record hi chhuan tham a ni.

NT-a chuan, "Chak lo tura zin nan chuan Dubai hi a hla lutuk. Chak ngei tumin Dubai khawpuiah ka kal dawn a, Pakistan boxer hi ka hneh ngei pawh ka inring a ni," a ti.

IBA intercontinental champion hian Aizawlah rim takin training a nei mek a, February 22-ah Dubai pan hian a chhuak ang a, February 23-ah thleng turin ruahmanna siam a ni.

World number 1 Hasanboy Dusmatov meuh hneha hming lo chher tawhtu NT-a chuan, "Ka fight neih hmasak lamah ka duh angin fighter hautak pek ka ni lo a, ka inbuatsaih ang hua inhnek tur pawhin an tlin ṭhin lo.

"World number 1 meuh ka hneh tawh a, ka theihna ka hrechiang. Chuvang chuan fighter hautak zawk hmachhawn ka duh a, hei hi fight buaipuitu Grassroot boxing promotions lam pawh ka hrilh a, anni pawhin an hrethiam.

"Tun ṭuma ka fight tur atan pawh boxer ṭha tak min pe a, ka tan chuan a lawmawm zawk a ni. Fida-a fight hi a video pawh ka en nual tawh a, boxer ṭha tak, fight tlak tak a ni dawn. Mahse, kei chuan hei tak hi ka châk chu a ni," a ti a, a zam loh thu Vanglaini a hrilh.

NT-a chuan hmachhawp thui tak a neih thu sawiin, "IBA intercontinental champion nih maiah hian tawp ka tum lo. World champion nih ka duh a, Mizo hming tiṭhatu nih ka duh. Chumi atan chuan ka inbuatsaih a, ka hna hmasa erawh Fida hneh a ni," a ti.

February 26-a NT-a te inhnekah hian Siaha boxer bakah Lalrinsanga Tlau, John Kenty leh Laldingliana te chu Mizo boxer inlan tur dang an ni a, Zonet kaltlangin inhnekte hi en theih tura chhawpchhuah a ni dawn.

Inhnek hi pay-per-view hmanga en tur a ni dawn a, Zonet kaltlanga en duh tan mahni veng distributor-te hnenah Rs. 100 pekin a en theih ang a, online aṭanga en duh tan Zonet Empai application kaltlangin a en theih dawn a, Empai bikah hian online kaltlangin pawisa pek tur a ni.