Tiger Woods-a'n beisei a la nei

Golf khel thiam hming-thang Tiger Woods chuan infiamna chawlhsan mai a la tum lo, ngai awh leh tur erawh chuan hun a la mamawh rei dawn nia a hriat thu a sawi chhuak.

Nikum February thla khan Woods hi car chesualah a ke a hliam a, tun thlengin enkawl a la ngai. Hnungzâng na vanga a buaina a fel hnu lawkah hliam a tuar leh a, a hun hnuhnung lamah natna vangin a buai ngun ta hle.

Kum 46 mi Woods chuan, "Uluk taka enkawl mek ka ni, inkhelhna hmanrua ṭhenkhat chu ka hmang leh ṭan thei tawh. Mahse, inkhel pangngai leh tur erawh chuan hun ka la mamawh rei dawn.

"Hun rei tak chhung din ringawt pawh ka la harsat, zawimuanga hmasawn zel erawh ka tum. A nihna takah chuan hliamte hi hun rei lote chhungin dam zung zung thei se ka duh ṭhin, kum upat tawh lama rei tak chhung nghah chu a hrehawm," a ti.

American golfer hian major title 15 zet a la a, ani aia la hnem chu vawi 18 champion Jack Nicklaus chauh a ni. Hliamin tlak buak lo se la chuan Woods hi fal taka awm thei tura ngaih a ni.