Hun tawp dawna Coman-a goal-in Salzburg lakah Bayern a chhan
UEFA Champions League-a vawi ruk champion tawh Bayern Munich-in last 16 vawi khat luhna RB Salzburg nena inhnehtawk turin vanneihna an mamawh a, minute 90-naah Kingsley Coman-a'n siphurh a sut hram.
Nilaini zan khan Red Bull Arena Salzburg-ah beisei loh thil a thleng a, Austrian club-in substitute Chukwubuike Adamu hmangin German champion lakah minute 21-naah hma an hruai. Mualneitu Salzburg an ṭang khawng a, amaherawhchu Bayern-in player neih ṭhat vanneihpuiin hun tawp hma hretin Coman-a'n goal pawimawh a khung.
Second leg hi March 8, Thawhlehni zan hian Allianz Arena-ah khelh a ni dawn a, Julian Nagelsmann-a hote tan quarterfinal kalkawng a la awlsamah a ngaih theih. Chutihrualin first leg inkhel thlirin Bavrians hi chak chiang sa tih a rem tawh lo.
Ruahmanna thar
Bayern manager Nagelsmann-a'n insiamṭhat tumin an khelh dan hmang a thlak hret, 4-2-3-1 formation hmang ṭhin aiah 3-2-4-1 an hmang.
Tlarhnungah defender pathum an hmang a, Niklas Sule pui turin wing back-a hman theih Lucas Hernandez leh Benjamin Pavard te an awm. Mual sir aṭanga nawr turin wing back ni loin winger Kingsley Coman leh Serge Gnabry te an awm thung.
Defensive midfield-ah Corentin Tolisso leh Joshua Kimmich te an awm a, tlarhmaah Robert Lewandowski mal tlatin Leroy Sane leh Thomas Muller ten an thlawp. Nagelsmann-a'n player a thlan dan aṭangin Austrian club lakah attacking game khelh a tum tih a chiang a, Bochum laka goal li chhuah team hian goal venhim kawngah hma an sawn lo a, an khelh dan an bel lo tih a lang bawk.
Boruak thlaktu Adamu
Ṭan phat aṭangin Bayern-in an nawr nghal a, Austrian forward Noah Okafor chu inhliam vangin minute 12-na lekah Chukwubuike Adamu-a'n a thlak. Salzburg tan Okafor inhliam hi chanchin duhawm lo ni mah se Adamu hi boruak thlaktu a ni ta zawk.
Austrian club-in counter attack hmangin minute 21-naah goal an khung. German forward Karim Adeyemi-a'n mual dinglam aṭangin a la lut a, a ball pass chu Brenden Aaronson-a'n khawih kawi zeuhin Nigerian forward Adamu-a'n goal kilah tak a khung.
Minute hnih hnu lekah American midfielder Aaronson-a'n chance insiamchawp goal-ah ṭha zetin pet mah se keeper Sven Ulreich-a'n a dang ṭha. Bayern-in chance ṭha siam an harsat a, Leroy Sane-a'n a chance neih goal zawnah a pet lo.
A tawpah Coman
Second half-ah Bayern-in player thlak lo mah se an goal bawh a na sawt. French winger Coman-a'n la lutin goal zawnah pet mah se keeper Köhn-a'n goal pawnah a nam sawnsak. Sane leh Coman ten wall pass hmangin Salzburg tlarhnung an ṭhiat leh a, Sane-a'n goal-ah ṭha takin pet mah se keeper Kohn bawkin a dang. Hemi per hi Gnabry-a'n tlawh hman mah se Kohn a rawn inrawlh hman.
Bayern tlarhnung erawh a la phui chuang lo. Salzburg-in counter attack aṭang bawkin chance an nei a, Lucas Hernandez hmaah Adeyemi a zam lo - German forward hian petna tur khawp a insiam hnuah goal-ah ṭha takin pet mah se keeper Ulreich-a'n ṭha zetin a dang. Hemi per hi Adamu-a'n goal ruakah a pet a, Pavard-a'n a dang hman hlauh.
A tawpah Bayern an vannei a, Pavard-a ball vawrhluh chu Thomas Muller-a'n tauh pialin Coman-a'n minute 90-naah siphurh sutna goal a khung. Goal dang lut tawh loin team pahnih 1-1 in an inhnehtawk.
Fuh lo a awm
German manager Julian Nagles-mann-a'n attack ti na turin winger a dah lut hnem a, tlarhnung a phui phah loh bakah Lewandowski-a'n ball ṭha a hmu lo. Polish striker Lewy dah ṭhatin a awm a, Salzburg tlarhnung phui ṭhat vang ni bawk mah se game plan fuh loh vangah a mawhpuh theih.
Bayern-in Sule contract an pawhsei sak lo a, German defender hian nipuiah Borussia Dortmund a zawm dawn. Hoffenheim defender hlui hian a theihna ang takin a khel chhuak lo a, Bayern tlarhnung pawpna chhanah a mawhpuh theih. Bavarians hian player inhliam an tuar tih a lang a, Leon Goretzka leh Aphonso Davies te awm se an harsatna tam zawk sut kianin a awm ang, amaherawhchu tun dinhmunah erawh an awm miau loh avangin an midfield pawh a pherh hle.
Bayern manager Julian Nagelsmann chuan, "Kan goal chhuah kha awlsam taka ven theih a ni. First half-a kan khelh dan kha Bochum laka kan chetsual dan nen inang chiah lo mah se a him lo hle. Second half-ah erawh inkhel kan thunun a, tlarhma aṭangin goal venhim hna kan thawk," tiin a sawi a, chakna goal khungtu Coman a fak bawk.