A zawnin Warriors an chak lo

Nimin zing NBA regular season inkhelah Golden State Warriors chu Denver Nuggets lakah 117-116 in an chak lo; Warriors hi tun hnaiah a zawnin vawi hnih an chak lo, an elpui Phoenix Suns erawh an chak zel.

San Francisco-a inkhelah team pahnih an inkhel tawk takzet a, hun tawp hma second 5.6 lek awm tawhah Golden State lamain 116-114 in hma an la hruai. Nuggets tana tih theih awm chhun chu 3-points vawm luh a ni.

Point 35 neitu Nikola Jokic-a'n ball a chang a, a team chak pui turin a shot ngei rin ni mah se Monte Morris a pe. Morris hian hamrik hnuhnung ber rik rualin 3-points a vawm lut a, inkhel pumpuiah point 13 chauh nei mah se a team chak pui nan a tawk.

Warriors tan Stephen Curry (25 points) leh Klay Thompson (16) te an khel chhe lo, chak ngei tur ni pawhin an lang hman. Mahse, ni danga team dang an lo hneh tawh ṭhin dan ang chu an lamah a thleng let ve ta zawk a ni.

Nimin inkhel dangah Phoenix Suns chuan Houston Rockets lakah 124-121 in hnehna an chang. Suns hi tun hnaiah a zawnin vawi sarih zet an chak ta, fal takin Western Conference hma an hruai, pahnihna GSW aiin match rukin an chak hnem tawh.

Chak lo tur anga an lan hnuah Los Angeles Lakers chuan Utah Jazz chu 106-101 in an hneh ve bawk. Kerek hliam vangin Anthony Davis a inlan thei lo a, inkhel tir lamah Lakers hi an che hleithei lo, dinhmun hniam zawk an ni.

Quarter hnuhnung ber an khelh dawnin Jazz lamin 79-71 in hma an hruai. Mahse, hun pawimawhah LeBron James inlarin point 33 a neih zinga 15 zet chu fourth quarter-a a neih a ni a, harsa takin a team a chakpui hram.

Lakers coach Frank Vogel chuan, "LeBron thil tih hi chu a ropui ṭhin, hriatreng a ni tawh ang," a ti. James hian a zawnin match 23 chhung chu point 25 a nei tling ziah, kum 37 mi ni tawh mah se a la ṭha hle.