ISL semifinal khelh hun tur a hriat

India rama club football inelna ngaihhlut hlawh ber Indian Super League enkawltu Football Sports Development Limited (FSDL) chuan ISL semifinal khelh hun an tichiang a, ṭum dang ang thoa double leg-a khelh tur a ni.

Semifinal first leg hi March 11, Zirtawpni zan leh March 12, Inrinni zanah khelh tur a ni dawn a, ni hnih an chawlh hnuah second leg an khelh chhunzawm ang.

Second leg semifinal hmasa zawk hi March 15, Thawhlehni zanah khelh a ni ang a, March 16 zanah semifinal pakhat zawka second leg chu khelh a ni leh dawn bawk a ni.

ISL final chu March 20, Pathianni zana khelh tura tih a ni a, final hi Pandit Jawaharlal Nehru Stadium, Fatorda, Goa-ah khelh tur a ni dawn a, semifinal khelhna tur stadium erawh puanzar a ni rih lo.

Covid-19 vanga Goa in a thlen ISL inelnaa semifinal-ah hian away goal rule hman a ni dawn lo a, inkhel pahnih belhkhawma goal khung tam zawk chu tlang tur an ni dawn.

ISL league round hi March 7-ah khelh zawh a ni dawn a, hmahruaitu ni chunga league round khartu team chuan League Shield an dawng ang a, AFC Champions League khel turin an tling dawn bawk.