January transfer zawhah kan chhe zawk - Conte

Tottenham manager Antonio Conte chuan January transfer-ah player pahnih la lut mah se an chhiat zawk thu a sawi. Spurs hian Juventus aṭangin Juventus duo Dejan Kulusevski leh Rodrigo Bentancur te lalut mah se player pali ngawt an chhuahtir.

London club chhuahtir hi Dele Alli, Tanguy Ndombele, Giovani lo Celso leh Bryan Gil te an ni. Conte chuan, "January thil thleng kha a awlsam lo. Player pali kan hloh a, Tottenham tana player pawimawh vek an ni a, player pahnih chauh kan lalut thung," tiin thlasik bazara thil thleng a sawi.

Italian manager Conte chuan sawi chhunzawmin, "A mihring zat aṭanga chhut pawhin kan chhe zawk tih a hriat theih," tiin January transfer zawha an chhiat zawk thu a sawi.

Spurs hian Conte hnuaiah league match vawi kua hneh loh nei loa an kaltluang hnuin league match vawi thumah a zawnin a chak lo. London club hian Chelsea, Southampton leh Wolves te an hneh loh zawn avangin Champions League khelh phak pawh a harsa

sawt dawn.

Chelsea leh Juventus manager hlui Conte chuan, "Bentancur leh Kulusevski te hi Tottenham duh dan chiah a ni. A chhan chu an kum la naupang, hmasawn thei tur an duh. Player inpeih tawh an duh lo. Chu tak chu kan buaina chu a ni.

"Club hi rang taka hmasawn kan duh a nih chuan player inpeih tawh leh tawnhriat nei ṭha a ngai a, chu chuan team-ah rah ṭha a thlen ṭhin. Amaherawhchu kan sawi nawn leh ang e. Club duh dan leh hma thlir chu tunah chuan ka hre ta," tiin an player chhawpsakah a lungawi loh thu a sawi.

Tottenham hian February 19, Inrinni zan dar 11:00-ah Manchester City hmachhawn turin Etihad Stadium an tlawh dawn a, Premier League champion lakah an tlawm a nih chuan a zawnin league match vawi li an chak dawn lo tihna a ni ang.