A mawngphah lakah champion lai an tlawm!
Spanish champion Atletico Madrid chu La Liga table mawngphah luahtu Levante lakah 1-0 in an chak lo. Diego Simeone-a'n Levante nen an intawn hnuhnung paliah chak ni hmel a hmu ta miah lo, thil mak danglam ve tak chu a ni.
An chak loh avangin Atletico point neih zat chu 39 a la ni reng a, table-ah pangana an ni. An chunga awm Barcelona nen an point hmuh zat a inang a, match khata an khelh tam bakah head-to-head an nei ṭha lo zawk bawk.
A mak, a na!
Season hmasa khan Levante hian Metropolitano Stadium-ah Atletico Madrid hi an lo luhchhuah tawh a, season hmasa an hman dan nena chhut chuan a mak hle. Kuminah pawh an talbuai leh em avangin Atletico mualah chak lo tura ngaih an ni.
Alessio Lisci enkawl team hian an league match hmasa 23-ah khan goal 50 teh meuh an chhuah a, team 20 inel zingah an chhuah hnem fal hle. An dawta chhuah hnem chu Alaves (39 goals) an ni, an inthlauhna hi goal 11 a tling.
Mahse, team talbuai hi Atletico mualah an ding khawng tlat a, minute 90 chhung an goal an venghim thei tlat. Second half minute 54-naah Gonzalo Melero chuan chakna goal awmchhun a khung, season kal laia vawi hnih an chakna chiah a ni.
Vanduaina
Diego Simeone-a'n tlarhmaah Matheus Cunha leh Angel Correa te bul a ṭantir a, Correa-a'n mawi takin a bin lut a, hun tawp hma chiahin si phurh sutah a inngai. Mahse, ball a chan hmain a ṭhianten Levante player laka an lo foul hman avangin an hnawlsak.
Bench aṭangin Joao Felix leh Luis Suarez te an lut bawk a, amaherawhchu anni pahnih pawh hian an mamawh goal an keng tel tlat lo. Champion team hian goal khung tumin shot vawi 10 nei mah se target zawna kal chu vawi khat chiah a ni.
Mikhual Levante lamin an goal hnihna an khung teuh hle bawk, halfway line bul aṭangin Mickael Malsa-a'n Atletico goalkeeper Jan Oblak inring lo lai a hmu fuh a, hla zet aṭanga a ball pet chuan bar a per dawp.
Insiamṭhat a ngai
Atletico Madrid hi tun season league match 10-ah an tlawmna a ni chiah, hmahruaitu Real Madrid nen khelh zat inangah an hniam zawkna chu point 15 zet a ni, an nomawi kawl lai chu an hloh dawn chiang tia sawi ngam a ni.
Simeone naute hian Inrinni zanah Osasuna an lenchilh zui nghal dawn, kar leh lama Manchester United nen Champions League an khelh tur inbuatsaih nan league lama hnehna lo chan hi a pawimawh, chutihrualin player siksawi erawh a ngaih a rinawm.
Atletico-in hun harsa an tawng mek, an khelmuala match an khelh hnuhnung parukah vawi thum ngawt an tlawm avangin an kulhpui meuh pawh a nghing mek. Mahse, Spanish club hian hun harsa kara zam ve ngai lo Simeone an nei a, tho leh turin theihna an nei.
Lawm leh lawm lo
Wanda Metropolitano Stadium-a goal awmchhun khungtu Levante midfielder Gonzalo Melero chuan, "A nihna takah chuan season harsa leh hrehawm tak kan hmang mek, inkhelh harsatna hmuna hnehna kan chang hian inrintawkna min pek belh ka beisei hle.
"Atletico ṭhatzia kan hria, an khelh ṭhat lai ber ni lo mah se an khelmualah chuan hmachhawn an awlsam ngai lo. Beiseina tlemte nei chungin kan lenglut a, huaisen taka kan beih rah kan seng," a ti.
Atletico goalkeeper Jan Oblak, "Kan ṭhat dan berin kan khel a, khatianga kan khel a nih chuan a chak theih loh. Kan nihna ang takin kan khel lo, tunah chuan Champions League khel phak ngei tura kan beih a ngai tawh ang," a ti.