Juventus an tho leh mek - Fabio Capello

Fabio Capello chuan beisei anga season hmang ṭha lo Juventus chu an tho leh mek tih a sawi a, season tir lamah kha chuan nasa takin an tlahniam tih phat tur a awm lo tih a sawi bawk.

Old Lady hian Massimiliano Allegri enkawlna hnuaiah beisei an phak lo takzet a, tunah erawh an kang ve leh deuh tawh. January bazara an lei Dusan Vlahovic leh Denis Zakaria ten danglamna an thlen.

Italian manager rorum Capello chuan, "Thlasik bazarah an che ṭha a, chu chu khelmual chhungah pawh a takin hmuh tur a awm nghal. An khelh dan phung pangngai kha an nei let leh mek tawh a, season tir lama an mualphona kha an hliah khuh theih ka ring.

"A bik takin tlarhma lama an player neih Vlahovic, Paulo Dybala leh Alvaro Morata te hi team dang tana hmachhawn châkawm lo tak an ni, eng team pawh chhaih buai thei turin an ṭha tawk," tiin Juve forward-te a ringtawk hle.

Capello hian 2004-2006 chhung khan Turin club hi a lo enkawl tawh a, season hnih chhung hian Serie A nomawi chawi ve ve mah se, dan kalha thil tih an neih avangin hlihsak an ni thung; Serie B lama paihthlak an nih bawk avangin Real Madrid a pan san ta zawk a ni.

Serie A table-a palina ni lai Juventus hian zanin dar 1:15 hian Torino an hmachhawn dawn. Kar lehah Champions League last 16 khel turin Villarreal an lenchilh zui leh nghal bawk ang.