Inelna hmuhnawm zawk kan beisei - Brawn

Formula 1 managing director Ross Brawn chuan season thar a thlirlawk a, kum hmasa lam aia inelna ṭha leh hnuhnawm zawk an neih theih a beisei thu a sawi a, hripui leng karah pawh intlansiak an chhawp chhuah leh theih a rin thu a sawi bawk.

Season hmasa khan Mercedes driver Lewis Hamilton leh Max Verstappen ten nomawi an inchuh na hle. Intlansiak hnuhnung berah hnehna changtu Max zawkin nomawi a chawi a, season tharah pawh anni pahnih bawk hi inel leh tura ngaih an ni ang.

Car intlansiakna sang berah hian tlan dan ṭhenkhat tih danglam a ni a, kawng ngil lai an tlan dan bakah car chei dan ṭhenkhat tih danglam a ni bawk. Heng danglamna hian rah ṭha a chhuah dawn em, tih chu kan hre thuai dawn.

Brawn chuan, "F1 huanga thutlukna kan siam tawh hi chu hmasawnna duh vang a ni zel. Kum tin hian a hma aia ṭha zawk inelna buatsaih kan tum ziah a, kuminah pawh chu kan thil tum chu a la danglam chuang lo.

"Team tinin theihtawp an rawn chhuah leh dawn, an inbuatsaihna leh hmanraw tharte hlawhtling taka an hman theih nan keini lam pawhin theihtawp kan chhuah, car intlansiak ngaina tute tan chuan duhthusam a ni ngei ang," a ti.

F1 season tharah hian intlansiak vawi 23 awm tura ruahman a ni a, intlansiak a tam ber ṭum a ni ang. Inelna hmasa ber atan March 20, Pathianni hian Bahrain Grand Prix an tlan ang.