Match hnihnaah Murray a chak lo

Qatar Open khelh laiah Andy Murray chuan match khat bak hnehna a chang thei lo. Nilaini zan khan last 16-ah inlanin Britain tlangval hi Roberto Bautista Agut lakah set la loin a tlawm.

World number 1 hlui Murray-a'n a khingpui Bautista Agut a ngam lo hle, 2019 champion hian 6-0, 6-1 in a sawp. Set hmasa zawk game hmasa berah deuce ve mah se, point nga chauh hmuh belhin set a hloh.

Set hnuhnung zawkah pawh Murray a tho chhuak thei chuang lo, game sarih an khelh zinga pakhat chiah a la, Spanish star hian a duhtawkin a sawp kual a tih theih, kawng engkimah a chungnung zawk.

Kum 2014 khan ATP Finals-ah Murray hian Roger Federer nen an inhmachhawn ṭumin game khat chiah a la, a hnu lamah tun ṭum hi a chak loh chian ber ṭum a ni. Match hmasa lama straight set a chak nen chuan boruak a inang lo hle.

World number 17 Bautista Agut hian a match lehpekah chuan Alejandro Davidovich Fokina a hmachhawn leh ang. Davidovich Fokina hian last 16 inkhel dangah Britain player tho Dan Evans chu 4-6, 7-5, 6-4 in a lo hneh ve bawk.

Qatar Open-ah hian seeded pakhatna leh champion tura rinkai Denis Shapovalov pawhin quarterfinal a lut, Canadian tlangval hian Alex Molcan lakah 6-4, 6-0 in hnehna a chang a, inelna neih laiah set a la hloh lo.