Sabalenka hnehtu Kvitova

Tennis inelna Dubai WTA Tournament khelh laiah, seeded pakhatna Aryna Sabalenka leh Barbora Krejcikova te chu second round lekah an zinkawng a tawp.

Nilaini zan inkhelah world number 2 Sabalenka hi tun hma lama Dubai Open champion tawh Petra Kvitova lakah 6-4, 6-4 in a chak lo. French Open champion Krejcikova pawh player langsar lo Dayana Yastremska lakah 6-3, 7-6 (703) in an tlawm ve bawk.

Player ṭha pahnih an tla a, champion tura rinkai dang Garbine Muguruza pawhin a beisei loh result a hmu. Spanish nula hi Russian star Veronika Kudermetova lakah 3-6, 6-4, 6-4 in a chak lo.

Player langsar tak tak an tlak lai hian Simona Halep erawhin hnehna a chang. Romanian nula Halep hi season hmasa aṭang khan hliam vangin a inkhel tam lo, tun ṭumah pawh hian seeded a ni phak lo.

World number 1 hlui hi seeded ni phak lo mah se a theihna a hniam phah chuang lo. Centre Court-a inkhelah a khingpui Elena-Gabriela Ruse chu 6-3, 6-2 a hnehin quarterfinal a in vaw kai thung a ni.

Australian Open khelh zawh takah khan Halep hi fourth round-ah a tla, tun ṭuma a khelh dan thlir chuan Dubai-ah hian champion tura rinkai a ni phak. Semifinal lut tur erawh chuan seeded pariatna Ons Jabeur a paltlang leh a ngai dawn.