Odisha leh Chennaiyin an inhnehtawk

Nilaini zan Indian Super League inkhelah Odisha leh Chennaiyin te 2-2 in an inhnehtawk a, team pahnih tan ISL semifinal khelh beiseina a tlem ta hle - a thiam pali zinga tel tur chuan an tan thilmak a thlen a ṭul tawh ang.

Chennai club tan Rahim Ali chuan minute hnihna lekah goal hmahruai khung mah se Odisha-in Javi Hernandez leh Jonathas Cristian de Jesus hmangin an chhanglet a, 2-1 a ni.

Mahse, Chennaiyin-in tlawm bik an duh lo tih pholangin Nerijus Valskis chuan si phurh a sut ve leh a, hun tawp thlenga goal dang lut loin 2-2 in an inhnehtawk.

Odisha tan Jerry Mawi-hmingthanga chuan goal khung belhna remchang nei mah se a hun ṭha neih a chhawr thei lo a, Chanmari tlangval hi minute 56-naah luhtir chauh a ni.

Jerry bakah hian Paul Ramfangzauva chu minute 72-naah bench aṭanga luhtir a ni a, Kolasib tlangval hian inkhel bul ṭantu, Hnahthial tlangval Isaac Vanmalsawma chu a thlak.