India chakin bul an ṭan

India-in mikhual West Indies lakah ODI series 3-0 a an lak hnuin T20 match hmasa berah an hneh lehnghal. Nilaini zan khan Eden Gardens, Kolkata-ah T20 match hmasa ber hi khelh a ni a, Men in Blue hi wicket rukin an chak.

Ṭhumvawrah India an vannei a, captain Rohit Sharma-a'n vawm hmasak a thlang. Windies tan Nicholas Pooran (61 runs) leh Kyle Mayers (31) te che ṭha mah se thlawptu ṭha an nei lo a, over 20-ah 157/7 runs an siam.

India tan bowler Ravi Bishnoi a khel ṭha a, Rajasthan tlangval hi ram tana T20 match a khelh hmasak berah 17 runs chauh pein wicket hnih a la a, man of the match-ah an thlang.

Men in Blue tan Windies target siamsak hi harsa ni lo mah se chetsual theihna erwah a ni pha. Opener pahnih captain Rohit Sharma (40) leh Ishan Kishan (35) ten bul an ṭan ṭha a, Suryakumar Yadav (34*) leh Venkatesh Iyer (24*) ten a tawp an khar ṭha bawk.

India hian over 18.5-ah 162/4 runs siamin hnehna an chang. Zanin dar 7:00 hian Eden Gardens-ah T20 match hnihna an khel ang a, February 20, Pathianni zanah match thumna leh tawpna ber khelh a ni ang.