Liverpool-in Man City an hnaih thei ang em?
Zanin dar 8:30-ah Liverpool-in Anfield-ah relegation zone-a awm Norwich City an mikhual dawn. Premier League hmahruaitu Manchester City-in zanin dar 11:00 hian Etihad Stadium-ah Tottenham Hotspur an mikhual ve bawk dawn. Reds tan point thum awlsam taka hmuh theihna a nih laiin Man City tan point hloh theihna a ni a, Jurgen Klopp hote tan Pep Guardiola hote nena an inkar tihzimna hun ṭha a ni thei ang.
Jota a tel lo
Liverpool-in Canaries lakah Diogo Jota an chhawr thei dawn lo a, Portuguese forward hi khualmuala Inter Milan an hneh ṭumin hliam vangin first half bak a khel lo. Kum 25 mi Jota hian Reds tlarhmaah hmun pawimawh a chang a, chutihrualin Carabao Cup final-a Chelsea an hmachhawn hunah erawh a dam hman a beisei.
Jota awm lo mah se Reds tlarhmaah Mohamed Salah, Sadio Mane leh Roberto Firmino te an awm a, Liverpool innghahna ṭhin pathum kha chhawr theiha an awm vek bakah player thar Luis Diaz an la awm cheu.
Midfield-ah pawh Harvey Elliott a dam leh tawh a, tlarhnung pawh Virgil van Dijk a dam chhung chuan eng team tan pawh paltlang a huphurhawm awm. Norwich erawh Manchester City laka 4-0 a chak lo hlim an ni a, Anfield-ah goal venhim chu an hna pui ber tur a ni.
Norwich manager Dean Smith chuan, "Anfield-a point hlawh chhuak tur chuan beiseina neih phawt a ngai. Liverpool goal bawh natzia kan hria a, goal kan khung duh a nih chuan nawr hun kan hriat a ṭul ang," tiin game plan fel tak an neih thu a sawi.
Big Match
Tun hnaiah Manchester City an kal fawr a, Tottenham erawh an talbuai lai tak ni mah se team enkawltu hi Antonio Conte a ni tlat. Etihad Stadium-a Premier League inkhel tur hi tunkar tawpa inkhel hmuhnawm ber tura chhal theih a ni ang.
Pep Guardiola hoten Norwich 4-0 a an sawp zawhah Champions League-ah meuh Sporting Lisbon 5-0 in an hneh a, an result bakah khelmuala an chet danin Man City ṭhatzia a pholang. Team ṭha tamna Premier League-ah Man City hi point kuain an sang fel thei a, mahse ngaih ṭha taka awm thei an ni lo.
Man City elpui ber Liverpoool-in match khatin an khel tlem a, an inthlauhna hi point rukah a tla thei. Pep-a hote hian Conte hote lakah point an hmu lo a nih phei chuan City leh Reds inkarah point thum chauh a awm thei a, Premier League champion tan ngaih ṭhatna chi a ni tawh lo.
Chutihrualin Man City hi October thla tawp lam aṭang khan league-ah chak loh an nei tawh lo a, match hnuhnung 15-ah vawi 14 an chak. Result ṭha an neih theih nan tlarhnung pawh an thuam ṭha, tun season-ah goal 14 chauh an la chhuah.
Sporting lakah hrem vangin Kyle Walker a khel thei lo a, Spurs lakah bul a ṭan a rinawm. Hliam vanga UCL-a tel lo Jack Grealish leh Gabriel Jesus te erawh an dam a nih pawhin bul an ṭan a rinawm chuang lo. Tlarhmaah tun hnaia che ṭha Riyad Mahrez, Phil Foden leh Raheem Sterling te an awm tlat.
Conte a talbuai
Tottenham-in Nuno Espírito Santo hoin season bul an ṭan a, match thum an chak zawn hnuah match thum an chak lo zawn. Amaherawhchu Portuguese manager hi che chhe hle mah se vawi li chak loh zawn a nei lo a, Conte erawh league match vawi li chak lo zawn thei dinhmunah a ding.
Italian manager Conte hian pressure a nei tih a chiang a, press conference hnuhnung berah January transfer-a club chet dan a sawisel chiam. Tottenham hian thlasik bazarah Spurs hian player pali Dele Alli Tanguy Ndombele, Giovani lo Celso leh Bryan Gil te chhuahtirin Juventus duo Dejan Kulusevski leh Rodrigo Bentancur te chauh an lalut.
Conte hian tun hnaia an chet ṭhat loh chungchangah club a mawhpuh a ni ber a, chutihrualin Italian manager hi mawphurhna la ngam coach a ni tih hriat a ṭha. Italy, Chelsea leh Juventus hlawhtling taka enkawl tawhtu Conte hian pressure lak kian nan ṭawngkam fei ki bar a hmangah a ngaih theih bawk.
A êng zawnga thlir erawh chuan Spurs hi Harry Kane leh Son Heung-min te awmna a ni a, Conte-a'n counter attack nan player ṭha pahnih hi thiam takin a hman theih a rinawm. Italian manager hian tlarhnung rem phui chu hna hmasaah a nei dawn a, goal venhim tuma an bet deuh a nih pawhin a mak lo ang.