Classic game hian min fuih phur ṭhin - Bielsa

Leeds United-in February 20, Pathianni zan dar 7:30 hian an hmelma Manchester United an mikhual dawn. Marcelo Bielsa hote hian tun season Premier League-a an match hmasa berah Old Trafford an tlawh a, 5-1 in a mualpho.

Argentine manager Bielsa chuan, "Classic game hian chona min pe a, min fuih phur ṭhin. Inkhel entute tan pawh a hlu ang," tiin Man United nena an inkhel tur chungchang a sawi.

Man United hi tun hnaiah che ṭha tawk lo mah se match hnuhnung pariatah minute 90 chhungin hneh loh an tawng lo. Ralf Rangnick-a hote hian an match hnuhnung berah Brighton 2-0 in an hneh a, Cristiano Ronaldo-a'n goal a khung bawk avangin Leeds hmachhawn turin an inpeih.