Jamshedpur-in Mumbai an ngam
Indian Super League a 'hot' chhunzawm zel - Ningani zan khan Jamshedpur chuan 3-2 in Mumbai City an hneh a, league hmahruaitu ni chunga season khar an tumna chu an hnaih leh ta sawt.
Mumbai erawh an chak zawh loh avangin top four pawn lamah an awm a, Des Buckingham-a enkawl team hian semifinal khelh ngei an duh a nih chuan an hmabak match liah tlawm a thiang tawh lo.
Jamshedpur hian minute 30 chhungin goal hnih an khung hman a, Rangers forward hlui Greg Stewart leh Ritwik Das-a goal khung hmangin 2-0 in hma an hruai der - harsa lutuk loin an chak dawn niin a lang.
Mizo tlangval Lallianzuala Chhangte chuan Mumbai tan an si phurh sut ṭhenna goal-a khungah a inngai hman a, mahse, Lunglei forward hian ball a lak thlakna lamah a kut a hman tel avangin a goal khung pawmsak a ni lo.
Mahse, Mumbai an ngawi reng lo - Rahul Bheke chuan minute 57-naah si phurh a sut ṭhen a, minute 69-naah penalty an hmu zui. Peter Hartley chuan Morutada Fall a tih tluk avangin penalty a chawi a, Igor Angulo a lo pen chhuak.
Mahse, Spain Under 21 international hlui hian goal-ah a chantir thei lo a, Jamshedpur keeper ṭha TP Rehenesh chuan a dansak. Mahse, vanneihnain Mumbai a hnuchhawn reng bik lo - minute 85-naah penalty an hlawh chhuak leh a, Diego Maurício chuan harsatna nei loin goal-ah a chantir.
Hun pek belh a ni tawh a, point insemin team pahnih an ṭin mai dawn nia ngaihna a lian hman. Mahse, Mumbai defender Mehtab Singh chuan penalty box-ah a kutin ball a tawk fuh a, hun pek belhah penalty a chawi!
Jamshedpur tan an thiampuipa Stewart chuan petin goal-ah a chantir a, a goal hnihna a khung bakah a team chu 3-2 in hnehna a chanpui. JFC-in point thum an hlawh chhuak a, chak mamawh Mumbai erawh kut ruakin khelmual an chhuahsan.
Jamshedpur tan Ricky Lallawmawma leh Laldinliana Renthlei ten minute 90 an khel tluan a, Durtlang tlangval Ricky hian inkhel ṭan aṭanga minute khatna lekah Boris Singh tan duhthusama ṭha ball a thlawh lut a, Manipur defender-in crossbar tauh per chu a tih theih san ber a ni.
Mumbai lamah Lalengmawia leh Lallianzuala Chhangte ten inkhel bul an ṭan ve ve bawk a, lakchhuah an ni lo.