Barca an chak zo lo; Valencia-in an hmuak

Europa League knockout playoff-ah Barcelona an chak zo lo a, an mikhual Napoli nen 1-1 in an inhnehtawk - Pathianni zan dar 8:45-ah league match khelh tur an nei zui a, Valencia khelmualah an leng ang.

Nou Camp-a inkhelah mikhual tlangnel Napoli-in goal an khung hmasa zawk a, Piotr Zielinski chuan minute 29-naah goal hmahruai a khung.

Barca tan Ferran Torres chuan minute 59-naah penalty hmangin si phurh a sut a, hun tawp thlenga goal dang lut loin team pahnih an inhnehtawk.

Zanin La Liga-ah Madrid khaw club pahnih an inlan dawn bawk a, Atletico Madrid chuan zan dar 8:45-ah Osasuna an lenchilh ang a, Real chuan zan dar 1:30-ah Alaves an mikhual dawn bawk.

Barca an vanduai?
Kum 18 dawn hnua a vawi khat nana Europa khel Barcelona-in goal an chhuah hma a, Italian club tan Zielinski-a'n goal a khung - Catalan club an mualpho leh ngei dawn niin a lang.

Mahse, Barca an insiamṭha zui a, inkhel an thunun viau chunga goal an khung thei lo erawh a la pawi thui thei - si phurh sut turin penalty an mamawh a, Adama Traore ball cross chuan Juan Jesus kut a fuh a, video assistant referee hmanga ennawn a nih hnuah penalty pek an ni.

Manchester City forward hlui Torres chuan penalty hi Barca a pan hnua a goal hnihna ni turin goal-ah a chantir a, mahse, Spanish forward hian goal dang a khung theih loh avangin inkhelh zawhah a mittui a dang zo lo.

Team pahnihin goal an khung hmain Torres hian goal khungna remchang nei mah se a chhawr lo a, penalty a chhuih luh hnua a chance neih a hlah pawh uiawm tak a ni - Pierre-Emerick Aubameyang chuan Barca a pan hnuah a vawi khat nan bul ṭan mah se a reh viau bawk!

Insiamṭhat a hun
Barcelona-in thlasik transfer hnua an match hmasa berah 4-2 a Atletico Madrid an hneh avangin an phur viau a, mahse, Madrid khaw club an hneh hnuah hian match hnih khel leh tawhin chak an nei lo!

Kar hmasa khan La Liga-ah an hneh ngei tura ngaih Espanyol an lenchilh a, Catalan derby-ah a vannei zawkah ṭangin hun pek belha Luuk de Jong goal khung hmangin an inhnehtawk hram.

Napoli lakah chak beisei laiin draw result an hlawh chhuak leh hram a, Europa last 16 takngial pawh an lut lo a nih chuan Xavi tan mualphona tawpkhawk a ni ang.

Pathianni zanah Barca fan-ten chak ngei beiseiin an team inkhel an en dawn a, an lenchilh tur hi an league match hnuhnung paruka chak nei lo Valencia an ni - Catalan club hi table-ah palina an ni mek a, mahse, parukna Real Sociedad aia an sanna hi point khat chauh a ni a, an tlawm chuan season tharah Champions League khel phak lo dinhmunah an ding thei dawn.

Atletico hi
Season hmasa lawkah La Liga nomawi an chawi a, tun season-ah erawh Atletico Madrid-in beisei an phak lo hle - an league match hnuhnung berah table mawngphah luahtu Levante chu 1-0 in an ngam lo.

Atletico hi Barca aiin an dinhmun a chhe leh chhawng a, Catalan club aia match khata khel tamin table-ah pangana an ni mek a, an point hmuh zat a inang bawk - an dinhmun a him lo hle.

Zanina Osasuna an lenchilh hunah Atletico tan chak ngei a ṭul dawn a, buai laia hliamin a kiansan bik lo hi an tan buai tizualtu a ni. Daniel Wass leh Antoine Griezmann te an inhliam mek a, Covid-19 vangin Yannick Carrasco a inlan thei lo bawk.

Atletico hi inelna hrang hranga an match hnuhnung pasarihah vawi li an tlawm a, vawi khat draw an nei a, vawi hnih chiah an chak - zaninah an tlawm leh chuan Nilaini zana Champions League last 16 first leg-a an mikhual tur Manchester United-in an zuam sawt ang.

Real beiseina
La Liga hmahruaitu chu Real Madrid an ni a, mahse, Carlo Ancelotti enkawl team hi an league match hnuhnung pangaah vawi hnih chiah an chak - vawi hnih draw an nei a, vawi khat an tlawm.

Tun hnai an result avangin an hmahruaina pawh point li chauh a ni tawh a, khelh zat inangah Sevilla-in an hnaih ta hle. Tun season-ah champion an tum a nih chuan zaninah chak an mamawh.

Hei chauh a ni lo - Madrid khaw club tan kum 2022-in kum duhawm a herchhuahpui lo em ni chu aw, tih mai tur a ni a, Spanish Super Cup nomawi chawi mah se Spanish Cup quarterfinal aṭangin an tla a, Champions League last 16 first leg-ah Paris Saint-Germain chu 1-0 in an ngam lo bawk.

Real tan insiamṭhat a hun tawh a, Karim Benzema a dam chian tawh bawk avangin fan-ten point thum aia tlema lungawi an tum lo ang.