India-in Asian Cup qualifier thleng dawn

All India Football Federation-in AFC Asian Cup 2023 Qualifier thlen a dilna chu Asian Football Confederation chuan a pawmsak a, June 8 aṭanga khelh ṭan tur qualifier hi Blue Tiger group bik chu India hian a thleng dawn a ni.

China-in a thlen tur AFC Asian Cup 2023-ah hian inelna thlengtu nena chhiar telin team 13 an inpetkai tawh a, hmun ruak 11 dang la awm chu team 24-in an inchuh leh dawn.

Team 24 te hi group parukah ṭhenin, group pakhatah team pali zel an awm a, group tina hmahruaitu leh pahnihna ti ṭha zual pangate chu Asian Cup khel tur hian an tling ang.

India bakah hian Kuwait, Kyrgyz Republic, Malaysia, Mongolia leh Uzbekistan te chuan an group qualifier ṭheuh chu an thleng dawn a, qualifier hi June 8, 11 leh 14-ah te khelh tura ruahmanna siam a ni.

AFC chuan FIFA World Cup qualifier chu Asian Cup khel tur zawn nan a hmang nghal a, second round group tina hmahruaitu leh pahnihna ti ṭha pangate chu inelna khel tur hian an tling nghal.

India erawh group E-ah pathumna an nih avangin Asian Cup khel tura tling nghal zingah an tel lo a, qualifier an khelh a ngaih phah dawn - February 24, chawhnu dar 12:30-ah qualifier-a inhmachhawn turte hi draw neih a ni dawn a ni.

AIFF general secretary Kushal Das chuan, "Mahni khelmual, a bik takin Kolkata-a qualifier hmachhawn chuan, kan tan Asian Cup khelhna chance a sang dawn tih kan hre sa a ni," a ti a, India-in Asian Cup a khelh ngei theih nana qualifier thlen dil an nih thu a sawi.

Asian Cup qualifier hi Salt Lake Stadium-ah khelh tura ruahmanna siam a ni a, Kushal Das chuan, "June-ah chuan boruak pawhin zia lam a pan tawh ang a, fans awm ngeiin inelna kan kalpui theih ka beisei," a ti.

India hian kum 1964, 1984, 2011 leh 2019 te khan Asia khawmualpuia ram leh ram, football hmanga inelna ropui ber hi a lo khel tawh a, kum 1964-ah pahnihna an nih chu an thlen san ber ṭum a la ni rih - an khum lawk pawh a rinawm chiah lo.