Odegaard-a'n beisei a nei sang

Chawhruala Premier League squad naupang ber ni mah se Arsenal-in hma lam an pan zel a, midfielder Martin Odegaard chuan thil tum sang tak an neih chu an tih hlawhtlin theih a beisei thu a sawi.

Gunners hi parukna an ni mek, palina Manchester United an phak lohna chu point li nimahse Mikel Arteta naute hi match thumin an khel tlem zawk; season thara Champions League khel turin beiseina an nei sang hle.

Kum 23 mi Odegaard chuan, "Player naupang kan tam a, chutih rualin tawnhriat nei tam leh hlawhtlinna chan chaka tuihal an tam bawk. Ka hmuh dan chuang eng maw danglam leh ṭha tak kan thlen theih ka ring.

"Tuna chona kan hmachhawn mek hi a nuam ka ti a, ka tan pawh a hlimawm. Huaisen taka chona hmachhawn zinga ka tel thei hi ka lawm, hmasawnna tur kan neih laiah kan inti chak tawn zel," a ti.

Real Madrid midfielder hlui hian North London club-ah hmun nghet a chang chho mek, a bik takin tlarhma a tlan player puitu pawimawh a ni. Player themthiam bik zinga mi a nih avangin a ṭangkai zel dawn ni pawhin a lang.

Norway captain chuan sawi zawmin, "Ka kum la tam vak lo mah se tawnhriat hi ka nei hnem ve tawh, kei aia naupang zawkte hnena thil hrilh ve leh chhawn tur ka neih hian nuam ka ti zual ṭhin, rah ṭha pawh a chhuah ngei ka beisei.

"Kan thawhhona a ṭha a, player theihna nei sang leh talent tih pun tur ngah tak tak an tam, chuvangin sang tak kan thlen theih hi ka beisei," a ti a, an thil tum thleng tur erawh chuan taihmakna leh tihtakzetna an mamawh dawn.

Premier League season ṭan ni khan Arsenal hi kai thar Brentford khelmualah an lenglut a, fans puihna ṭha tak hnuaiah Bees hi 2-0 in an chak. Arteta nauten phuba lak theihna remchang an nei dawn.

Zanin dar 8:30 hian Emirates Stadium-ah Arsenal hian Brentford hi an lo mikhual ang.