Bayern tan insiamṭhatna remchang

Bayern Munich-in match hnuhnung pahnihah hnehna chang zo lo. German champion hian Bundesliga-ah kai thar VfL Bochum 4-2 in an hneh lo a, Champions League-ah RB Salsburg nen 1-1 in an inhnehtawk bawk. Julian Nagelsmann-a hoten February 20, Pathianni zanah Greuther Furth an mikhual dawn a, insiamṭhatna remchang a ni thei ang.

Bavarians hian nikum September thla khan Furth hi 3-1 in khualmualah an hneh tawh a, tun ṭumah pawh chak tura rinkai ni mah se tun hnai result thlirin Allianz Arena-ah chesual thei an ni. Bayern-in hliam vangin captain Manuel Neuer bakah Alphonso Davies leh Leon Goretzka te an chhawr thei lo a, Nagelsmann-a'n hun harsa a tawng mek.

RB Salzburg nena an inkhelh ṭumin Bayern-in goal an chhuah hmasa a, tun hnaiah an tlarhnung a pawp lehzual. Kumin chhunga match ruk an khelh tawhah goal 10 an chhuah a, Bayern hian tlarhnung aṭanga an insiamṭhat a ṭul.

Bayern legend Lothar Matthaus chuan Lucas Hernandez leh Dayot Upamecano te chu an man phu khawpa an la khelh loh thu a sawi a, Umapecano phei chu Salzburg lakah bench-ah a ṭhu tluan. Furth an hmachhawn hun an theihna a phochhuah ngei a ṭul ang.