Europa League-ah Rangers-in Signal Iduna Park an luhchhuah

Europa League knockout playoff-ah Rangers-in Signal Iduna Park-ah result duhawm bik an hlawh chhuak a, mualneitu Borussia Dortmund chu 4-2 zetin an sawp. Scottish club tan James Tavernier, Alfredo Morelos leh John Lundstram ten goal khat ṭheuh an khung bakah Dortmund defender Dan-Axel Zagadou-a'n an lamah a ti lut. Giovanni van Bronckhorst hote last 16 lut turin an dinhmun a ṭha.

Scottish champion Rangers hian an mikhualna ramah bul an ṭan ṭha a, inkhel broruak pawh a sang. Team pahnihin chance an inneih chhawk a, Dortmund-in chance ṭha an hlah hnem zawk. Amaherawhchu mikhual team an vannei a, Zagadou kutin ball a fuh avanga penalty an hmuh chu minute 38-naah James Tavernier-a'n goal-ah a chantir.

Rangers an khel ṭha chhunzawm a, minute thum hnuah corner aṭanga bal kal Joe Aribo tauh chu goal ruakah Alfredo Morelos-a'n a tlawh lut. Second half ṭan aṭang minute linaah Sheffield United midfielder hlui Lundstram-a'n mawi zetin box pawn aṭangin a khung, mumang rama cheng Rangers ṭantute an sapatal nasa.

Minute 51-naah Dortmund beiseina siam turin Lundstram-a goal ang bawka ṭhain English rawlthar Jude Bellingham-a'n box pawn aṭangin siphurh a sut ṭhen a, mikhual team an phur. Amaherawhchu minute thum hnuah Dortmund defender Zagadou-a'n an lamah a tilut a, team nem zawka ngaih Rangers-in 4-1 in hma an hruai.

Team ṭha zawk Dortmund-in second leg-a beisei neih nan theihtawp chhuahin an nawr chhunzawm a, Glasgow an zin huna hna awlsam hret nan Raphael Guerreiro-a'n minute 82-naah kawh zetin a pet goal - keeper Allan McGregor a che lo.

Rangers-in goal dang an chhuah tawh lo a, 4-2 in chak. Dutch manager Giovanni van Bronckhorst chuan, "Dortmund inkhel kan en hnem a, tun hnaiah goal an chhuah hnem tih kan hria. Kan inzir ṭha a, chutihrualin rilru lam inpeih a ṭul tel bawk. Kan rilru put hmang a dik a, result ṭha tak kan hlawh chhuak. Min ṭantute pawhin kan result hi an chhuang ngei ang," tiin inkhelh banah a sawi.

Dortmund-in striker chhuanvawr Erling Braut Haaland chu inhliam vangin an chhawr thei lo a, Norwegian striker hian a ṭhiante chak loh lai hi hrehawm ti takin a thlir. Second leg-ah erawh Dortmund goal khung khawl hi a awm theih tawh beisei a ni a, Glasgow-ah inkhel hmuhnawm thlir tur a awm dawn. Chutihrualin Dortmund-in result ṭha neih an harsat avangin nipui bazarah Haaland hian club ṭha zawk pan tura thutlukna a siam mai a rinawm ta hle.

Thlirna Tawi
• Champions League ang thoin Europa League knockout chinah away goal rule a awm lo.
• Tun season-ah Europa League khelh dan phung thlak hret a ni a, second round khelh dan an thlak.
• Europa League group stage-a pakhatnain last 16 an lut nghal.
• Last 16 lu tawh team-te chu Lyon, Monaco, Spartak Moscow, Eintracht Frankfurt, Galatasaray, Red Star Belgrade, Bayer Leverkusen leh West Ham United te an ni.
• Champions League group stage aṭanga tla thla (pathumna) leh Europa League group stage-a pahnihna ten knockout playoff an khel.
• Europa League knockout playoff first leg khelh zawh a ni a, second leg hi February 24, Ningani zanah khelh a ni ang.
• Europa League last 16 draw hi February 15, Zirtawpni tlai dar 4:30-ah neih a ni ang. Last 16 first leg leh second leg hi March 10 leh March 17, 2022-ah khelh leh tur a ni.

Europa League
Knockout Playoff
1st leg : February 17, Ningani zan
Barcelona 1 - 1 Napoli
BAR : Ferran Torres 59'
NAP : Piotr Zielinski 29'
Zenit 2 - 3 Real Betis
ZEN : Artem Dzyuba 25'; Malcom 28'
BET : Ruido Rodriguez 8'; Willian Jose18'; Andres Guardado 41'
Borussia Dortmund 2 - 4 Rangers
BOR : Jude Bellingham 51'; Raphael Guerreiro 82'
RAN : James Tavernier 38' (P); Alfredo Morelos 41'; John Lundstram 49'; Dan-Axel Zagadou 54' (OG)
Sheriff 2 - 0 Sporting Braga
SHE : Sebastian Thil 43' (P); Adama Traore 82'
Sevilla 3 - 1 Dinamo Zagreb
SEV : Ivan Rakitic 13' (P); Lucas Ocampos 44'; Anthony Martial 45+1'
DIN : Mislav Orsic 41'
RB Leipzig 2 - 2 Real Sociedad
RBL : Christopher Nkunku 30'; Emil Forsberg 82' (P)
RSO : Robin Le Normand 8'; Mikel Oyarzabal 64' (P)
Atalanta 2 - 1 Olympiakos
ATA : Berat Djmsiti 61', 63'
OLYM : Francisco Soares 15'
Porto 2 - 1 Lazio
POR : Toni Martinez 37', 49'
LAZ : Mattia Zaccagni 23'

2nd leg : February 24, Ningani
Dinamo Zagreb 11:15 PM Sevilla
Real Sociedad 11:15 PM RB Leipzig
Olympiakos 11:15 PM Atalanta
Lazio 11:15 PM Porto
Napoli 1:30 AM Barcelona
Real Betis 1:30 AM Zenit
Rangers 1:30 AM Borussia Dortmund
Sporting Braga 1:30 AM Sheriff