PSG-ah ka hlim - Mbappe

Kylian Mbappe chuan Paris St Germain-ah a hlim thu a sawi a, a hma hun erawh a la chiang lo chhunzawm zel thung. France international hian tun season tawp thleng daih bak PSG tan contract a nei tawh lo.

Paris club hian Mbappe contract pawhsei tumin hma an la fo, mahse a hlawhtling thei rih lo. Sum chauh ni loin Mbappe hian thuneihna pawh a duh tel tih a hriat theih, chutihrualin a naupan lai aṭanga a khelh châkna Real Madrid hipna a na hle bawk.

Kum 23 mi Mbappe chuan, "Ka hma hun ka la tichiang lo, tunah hian khawvela club ṭha berte zinga mi Paris Saint Germain tan ka khel mek, nuam ti leh hlim takin ka inkhel thei hi ka lawm.

"Season thara ka khelhna tur min zawttu an tam, sawi chian theih a la ni lo. Tunah chuan PSG tan theihtawp ka chhuah, nakinah ka hma hun chu a la chiang mai ang," tiin a sawi a, a chhuak ngei dawn tih sawi lo mah se a chhuah a rinawm.

Tun season kal laiah Mbappe hian inelna hrang hrangah PSG tan goal 22 a khung a, assist vawi 16 a nei bawk. Lionel Messi leh Cristiano Ronaldo te huanga awm ve tur chuan hmabak a la ngah bakah hlawhtlinna sang a chan theihna tur club zawm a pawimawh.

Ligue 1 hmahruaitu hi Real Madrid hneh hlim an ni a, an boruak a ṭha. Zanin dar 1:30 hian league match khel turin Nantes an lenchilh zui leh nghal ang.

Ligue 1

Zanin Inkhel Tur
Lens 09:30 PM Lyon
Nantes 01:30 AM PSG

February 20, Pathianni
Nice 05:30 PM Angers
Lorient 07:30 PM Montpellier
Reims 07:30 PM Brest
Rennes 07:30 PM Troyes
Saint-Etienne 07:30 PM Strasbourg
Bordeaux 09:35 PM AS Monaco
Marseille 01:15 AM Clermont