Martial-a'n Sevilla tana a goal hmasa ber a khung

Sevilla-in Europa League knockout playoff-ah Dinamo Zagreb 3-1 in an sawp. Anthony Martial chuan first half injury time-ah Spanish club tana a goal hmasa ber a khung a, French forward goal khung hma hian Sevilla tan Ivan Rakitic leh Lucas Ocampos ten goal khat ve ve an khung bawk.

Ramon Sanchez Pizjuan-ah Rakitic-a'n minute 13-na lekah penalty aṭangin a khung a, minute 41-naah Mislav Orsic-a'n siphurh a sut. Amaherawhchu Ocampos-a'n minute 44-naah mawi zetin hmahruai nawnna goal a khung a, Martial-a'n a khung leh bawk avangin Sevilla hi dinhmun ṭhaah an awm.

Manchester United aṭanga Sevilla-in loan hmanga an hawh Martial chuan, "Nuam ka ti hle. Hun rei tak chhung match thum a zawnin ka khel tawh lo. Football khelh hian min tiphur a ni. Min ṭantute hma ngeia goal ka khung kha ka ngai hlu a, hnehna kan chan avangin kan lawm," tiin a sawi a, Old Trafford lamin a lung a len lo tih hriat mah se Spanish club leh Manchester United ten inremna an ziahah player lei theihna a tel lo.