Milan hmaah a hniam ber Salernitana

Serie A hmahruaitu AC Milan chuan zanin dar 1:15 hian league match an khel dawn, table mawngphah luahtu Salernitana khelmualah an lenglut ang. Tun dinhmunah chuan team pahnih inkarah hian club 18 zet an awm avangin an inthlau hle.

Stefano Pioli-a naute hian hnehna an chang a nih chuan point liin an sang fal thei dawn. Pathianni zana inkhel tur Inter Milan tan pressure an siamsak thei dawn, chuvangin champion an duh a nih chuan chak a pawimawh dawn hle.

Salernitana erawh an zam bik lo, a hniam bera awm ni mah se inhamtan an la beisei. Manager thar Davide Nicola chuan a nauten rilru thar an put thu a sawi a, a kaihhruaina hnuaia an match hmasa berah point hmuh an tum dawn.

Season kal laia Salernitana manager pathumna Nicola chuan, "Kan hma lama thla thum kan hman tur hi uluk takin ka zirchiang a, tunah a bul kan ṭan nghal a ngai. Ni dang kan nghak a nih chuan team dangin min lo kalsan leh hman ang.

"Team ṭha kan hmachhawn nghal tur pawh hi a lawmawm, chona sang tak a ni nghal dawn. Ka naute hian inkhelh an châk a, khelmual luh hma aṭanga dawih zawk sa ang ngawt an ni tawh lo," tiin inrintawkna an neih thu a sawi, chak erawh a la harsa mai thei.

Champion lai Inter Milan chu Pathianni zanah an inlan dawn, table laihawla mi Sassuolo an mikhual ang. Tun hnaiah Simone Inzaghi naute an khel ṭha tawk lo, an elpui AC Milan an ngam loh bakah Napoli nen an inhnehtawk.

Champions League-ah Liverpool an hneh lo a, an result a duhawm lo chho hle. Serie A hmahruaitu an nihna nei let leh tur chuan chetsual fo a remchang tawh lo, an khelh hmabak la neiha an chak thei a nih erawh chuan a chung berah an la awm thei.