ECL-ah Leicester an chak awlsam

Brendan Rodgers-a'n Europa Conference League a hriat loh thu sawi mah se ECL-a an inlan hmasak berah chak turin harsatna an tawk lo a, an mikhual Randers FC chu 4-1 in an hneh.

Foxes tan Wilfried Ndidi, Harvey Barnes, Patson Daka leh Kiernan Dewsbury-Hall ten goal khat ṭheuh an khung a, Randers tana Vito Hammershoej-Mistrati goal khungin awmzia a nei phak lo.

Ningani zana Leicester inlanna hi ECL knockout round playoff a ni a, February 24-ah second leg khel turin Randers khelmualah an leng ve leh ang - an chak chuan ECL last 16 an lut ang.

Leicester beiseina
Foxes-in tun season Premier League-ah beisei an phak lo a, season thara European football khelh chu an tan vana rah ang a ni - ECL nomawi an chawi erawh chuan Europa League an khel thei dawn a, hei hi hre ranin Rodgers-a'n a player neih ṭhat a thawhchhuahpui.

King Power Stadium-ah a tir aṭangin Foxes-in an nawr na nghal - Daka chuan uiawm takin a tauh over a, Dewsbury-Hall-a shot chu goal line aṭangin an pet chhuak hman a, Caglar Soyuncu leh Daniel Amartey ten an chance neih an chhawr lo bawk.

Goal an khung hma hauhin Leicester-in chance an ngah a, minute 23-naah Ndidi chuan a khung ta nge nge. Mahse, Danish club-in chawlhlawk hmain Hammershoej-Mistrati hmangin si phurh an sut a, 1-1 in chawlhlawk an hmang.

A tawpah Foxes
Chawlhlawk hmaa si phurh suttu Randers an phur sawt tura ngaih a nih laiin, team pahnih quality a inthlau hret. Second half ṭan aṭanga minute lina lekah Barnes chuan goal a khung ṭan lehnghal der.

Daka leh Dewsbury-Hall ten an khung belh leh bawk a, hun tawp thlenga goal dang lut tawh loin Leicester an chak chiang - second leg khelh tur la awm mah se Rodgers-a naute hian last 16 an luh ngei a rinawm tawh.

Foxes tan thiampuipa James Maddison chu hliam vangin lakchhuah ngai mah se Rodgers chuan, "Ngaihtuahawm a ni lo e," tiin a player chungchang a sawi.

Hmabak chu
Foxes hian Randers an hneh hma hian inelna hrang hrangah match nga zet chu a zawnin hnehna an chang zo tawh lo a, ECL-a an result hian beiseina thar a siam ang.

Rodgers chuan, "Kan ṭhat dan berin kan khel leh ang - player inhliamte an lo kir ang a, hun rei kan mamawh tawh lo ang. Kan game a ṭha a, hma kan sawn tih a lang. A sang thei ang bera league khar chu kan tum a ni a, hmasawn zel kan tum bawk ang," a ti.

Foxes hi Pathianni zan dar 10:00-ah league match khel turin an inlan dawn a, Wolverhampton Wanderers an lenchilh ang. Rodgers chuan, "A ṭha thei ang bera season hman a, season thara chhunzawm kan tum. He inelnaah hian champion tum vek kan tel a, kan danglam bik lo," a ti a, ECL a ngai thutak sawt hle.

Europa Conference League
Knockout Playoff
1st leg : February 17, Ningani zan
PSV Eindhoven 1 - 0 Maccabi Tel Aviv
PSV: Cody Gakpo 11'
Fenerbahce 2 - 3 Slavia Prague
FER: Dimitris Pelkas 58'; Ferdi Kadioglu 83'
SLA: Ibrahim Traoré 45'; Oscar Dorley 62'; Ondrej Lingr 63'
FC Midtjylland 1 - 0 PAOK FC
FCM: Joel Andersson 20'
Rapid Vienna 2 - 1 Vitesse
RAP: Ferdy Druijf 1'; Marco Grüll 15'
VIT: Loïs Openda 74'
Marseille 3 - 1 Qarabag
MAR: Arkadiusz Milik 41', 44'; Dimitri Payet 90'
QAR: Kady 85'
Leicester City 4 - 1 Randers
LEI: Wilfried Ndidi 23'; Harvey Barnes 49'; Patson Daka 54'; Kiernan Dewsbury-Hall 74'
RAN: Vito Hammershoej-Mistrati 45'
Celtic 1 - 3 Bodo/Glimt
CEL: Daizen Maeda 79'
BOD: Runar Espejord 6'; Amahl Pellegrino 55'; Hugo Vetlesen 81'
Sparta Prague 0 - 1 Partizan
PAR: Queensy Menig 78'