I League club Aizawl FC an thiam

13th October, 2018

Complex Field, Serchhip-a Mizoram Premier League match hmasa berah Aizawl FC-in 4-1 in Bethlehem Vengthlang FC an hneh.

Nimin inkhel hmuhnawm takah F. Lalremsanga, Ganefo Ansumana Kromah, Lalrinfela leh Lalkhawpuimawia ten goal an khung a, BVT tan PC Vanlalhruaia'n a khung ve bawk.

A hmuhnawm nghal

Ruahsur vangin entu lam tan khelmual pan harsa deuh mah se inkhel hmasa ber erawh a nung nghal a. Aizawl FC-in an player thar Kromah bul an ṭan tir a, Liberian forward a hmuhnawm hle.

Minute 9-na lekah Lalbiakzuala vawrhluh chu BVT left back David Lalrinsanga'n hmun hlauhawm laiah pet letin Remsanga' mawi zetin a volley goal.

Goal hmasa ber luh danah BVT keeper Eddie Zorammawia dem theih a ni lo a, Lunglei tlangval hian Paul Ramfangzauva freekick leh Isak Vanlalruatfela goal khung tur a dang ṭha takzet.

AFC-in inkhel an thunun a, Remsanga'n a tlan chakna hmangin defender a tlan pel a, keeper Eddie-a'n a tihtluk vangin penalty a hlawh. Kromah a rawn pen chhuak a, Mohun Bagan forward hlui hian cool takin a khung.

A goal belh

Aizawl FC-in Kromah la chhuakin midfielder Bectur Targat Uulu an dahlut mah se BVT-in bul an ṭha zawk.

Minute 49-naah BVT mid-fielder Hruaia'n mawi zetin box pawn aṭangin an khung a, inkhel a nung sawt.

Amaherawhchu, BVT insiamṭhat tak tak hmain Rinfela'n minute 55-naah AFC goal thumna a khung a, chak tur a hriat zui nghal.

Aizawl FC substitute Khawpui-mawia goal khung tur BVT keeper Eddie-a'n dan sak mah se injury time-ah erawh a dang nawn thei lo. Kelkang tlangval Mapuia hian chak nemngheh nan Rinfela siam sak chu a pet goal.

Gift a lawm

Aizawl FC coach Gift Raikhan chuan, "Ruah a sur nasat avangin kan game plan kan thlak a ṭul a. Chutichung chuan kan khelh dan a lungawi thlak hle. Goal chance kan insiam hnem a, goal li kan khung a, result lawmawm tak a ni," tiin Vanglaini a hrilh.

Gift chuan sawi chhunzawmin, "October 28-ah I League ṭan a ni dawn a, hemi atan hian ṭha lehzuala training kan mamawh a. MPL leh I League-ah result ṭha kan duh ve ve a ni," tiin I League season hnuhnung bera best coach chuan a sawi.