Tlai dar 2:15-ah Chanmari FC vs Chhinga Veng FC

Serchhip-ah Mc Dowell's No. 1 Soda Mizoram Premier League Season 7 khelh a ni a, match hnuhnung berah inkhel hmuhnawm ber tura ngaih Chanmari FC leh Chhinga Veng FC te an inhmachhawn dawn.

Tlai dar 2:15 hian Complex Field-ah an inkhel dawn a, Serchhip mipui tan inkhel hmuh-nawm hi hmaih phal chi a ni lo ang.

MFA Cup champion

Chanmari FC-in kum 2013 khan Khawtetlang Field, Serchhipah Dinthar FC hnehin MPL club an nih hnua an nomawi lian tham hmasa ber an chawi a. Hemi season hian MPL nomawi chawi lo mah se MPL2 leh MPL5-ah te a champion ta tho a, tualchhung football-a sulhnu nei ṭha ber zinga mi an ni.

Chhinga Veng hian MPL an khelh hma season-ah March 2016 khan MFA Cup-ah an champion ve bawk a, hemi ṭum hi Serchhip-ah tho nghah ni mah se he inelnaah hian MPL club tel tawh loin District champion te inelna a ni thung.

Club dinhmun

Chanmari FC-in coach Lalsangzuala Hmar hnuaiah MPL5-ah an champion a, amaherawhchu Sanga an chan hnuah Chanmarians ropuinain tlahniam nghal.

Coach thawkrim Sanga'n Chhinga Veng a zawm a, club lan dan a dang nghal. Chhingcows hian season hmasa berah MFA Super Cup, I Day Football leh MPL-ah an champion nghal.

Tun season-ah pawh a MFA Super Cup leh I Day Football-ah an champion leh tawh a, MPL-ah hneh loh an la tawn loh bawk avangin team ṭha ber anga chhal theih an ni.

Dinhmun ṭha Chhingcows

Chhhinga Vengin Ni-nganiah Serchhipah an thleng tawh a, training an nei nghal. Nimin lamah hahdamna hun ṭha an nei a, an player pawimawh MS Dawngliana te an dam ṭhat bawk avangin Chanmari hmachhawn turin an inpeih tawh.

Chanmari FC-in nimin khaw chhe karah Serchhip an thleng chauh a, hahdamna hun ṭha an nei lo.

Serchhip tlangval

Chanmari tana chan-chin lawmawm erawh Serchhip tlangval Mark Zothanpuia an kawl a, hei vang hian khaw mipui ṭan an hlawh ang.

Mark hian Bethlehem VT leh Mizoram Police lamah chakna goal a khung a, Serchhip mipuiin an khawtual tlangval che tla lai en hi an tih makmawh a ni.