Chawnpui lakah Police ṭhatna a lang

Mc Dowell's No.1 Soda Mizoram Premier League Season 7-ah Mizoram Police squad chhahna a lang ṭan a, nimin tlai khan Chawnpui FC 2-0 in an hneh.

Complex Field, Serchhip-a inkhelah hian Police tan Eric Lalsangzuala leh Malsawmfela ten hun chanve hmalam leh hnu lamah an khung a.

Thenzawl-a Police Training Centre aṭanga Police team zawmtu Sawmfela, man of the match a thlan keeper F. Lalmuanawma bakah Lalrinzuala Khiangte, Lalhmunmawia, Lalruatpuia leh R. Malsawmtluanga te an ṭangkai hle.

Ruahsur hnuaiah

Serchhipah nasa takin ruah a sur a, passing game lantir theihna a nih loh avangin long ball an pet nasa a, tharum ngah an ding chang.

Tui tling vangin ball pet thiam Police midfielder R. Malsawmtluanga leh Chawnpui midfielder Vanlalthanga te freekick a hlauhawm loh.

Chawnpui tan David Laltlansanga ten goal khung theihna nei mah se Police keeper F. Lalmuanawma an paltlang thei lo.

Minute 40-naah Police tan Lalrinzuala Khiangte cross chu Eric-a'n a pet goal a, ruahsur vanga ball pet a harsat avangin goal a pawimawh bik a ni.

Police nge nge

Chawnpui FC-in second half-ah an siphurh sut tumin an nawr na a, Police keeper Muanawma'n hna a ngah hle.

Amaherawhchu, Police-in chance ṭha bik an ngah zawk. Malsawmfela ball pek Lalfakzuala'n crossbar a pet per a, Sawmfela vek hian hnai tak aṭangin a hlah bawk.

Player ṭha chelh reng theih a ni lo a, minute 71-naah Sawmfela'n Chawnpui captain Lalthlamuana mawi zetin a bum a, chiang takin a pet goal zui bawk.

Goal hnih vangin Chawnpui an zuai a, Police erawh an phur phah thung. Substitute Lalbiaknunga cross chuan goal ban a per a, hemi hnu hian F. Lalrinpuia leh Fakzuala'n ten chance ṭha an hlah leh bawk.

Chawnpui pawhin hun tawp lamah siphurh sut ṭhenna remchang a nei a, amaherawhchu Avid-a leh Vanrammawia Ngente te an hriam tawk lo.

Engtin zel?

Police-in hnehna an chan avangin point kua an hmu a, pangana dinhmun hauhin Chawnpui FC erawh point sarih hnuin paruknaah an awm thung.

Tun dinhmuna a lan dan chuan semifinal khelh beiseiawm zingah an ding chho leh ta a, an kal zel dan turah erawh training nei lai player an chhawr theih dan turah a innghat thui khawp ang.