Quarterfinal-ah India tleirawlte

Argentina khawpui Buenos Aires-ah 2018 Summer Youth Olympic neih mek a ni a, Ningani zan khan India hmeichhe hockey team chuan an pool match hnuhnung berah South Africa chu 5-2 a hnehin quarterfinal an lut.

India tan hian Mizo nula Lalremsiami Hmar chuan goal khat a khung a, Asian games silver medalist Siami hian Youth Olympic-ah goal sarih a khung tling ta chiah. Ani bakah hian Mumtaz Khan chuan goal hnih khungin, Reet leh Ishika Chaudhary te chuan goal khat ve ve an khung bawk.

Pool A-ah India hi an awm a, a thlengtu Argentina hneh lo mah se match dang paliah hnehna chang vekin, point 12 an hmu a, an pool-ah pahnihna an ni - quarterfinal-ah chuan Pool A lama pathumna Poland nen an intawng leh dawn a ni.

Nimin tlai thleng kha chuan India hian medal paruk an neih sa bak an la lak belh rih lo, chutih rualin medal an lak belh ngei dawn tih erawh a chiang. Mipa badminton inelna huangah Lakshya Sen chuan seeded pahnihna Kodai Naraoka chu 14-21, 21-15, 24-22 a hnehin final a lut; a chhe berah pawh silver tal a la dawn tih a chiang tawh.

Youth Olympic Games-ah hian ram 205 aṭangin infiammi 3,997 zet an kalkhawm a, medal 287 chu ram 66 hnenah sem chhuah a ni tawh. Russia chuan gold 18 lain hma an hruai fal hle a, anmahni hnaih bertu Hungary chuan goal pariat an nei tawh - India chuan gold medal pathum an nei ve tawh bawk.