UEFA Nations League ; Ronaldo tel loin Portugal an chak
Cristiano Ronaldo awm lo mah se Portugal-in an thiampuipa tel lo pawhin hnehna an chang thei tih an pholang a, Ningani zan khan an mikhualna ramah Poland chu 3-2 in an hneh.
UEFA Nations League, League A3 inkhelah hian European champion tan Andre Silva, Kamil Glik (own goal) leh Bernardo Silva ten goal an khung a, Poland tan Krzysztof Piatek leh Jakub Blaszczykowski ten goal khat ve ve an khung bawk.
Poland tan hian captain Robert Lewandowski pawh a inlan a, mahse Bayern Munich striker hian ram tana a match 100-na a khelh zanah goal a khung thei lo a, a team a chakpui zo ta lo.
Chhinchhiah tlak Piatek
Europe-in tun season-ah rin loh lam aṭangin striker pakhat a hmu a, a hming chu Krzysztof Piatek a ni. Kum 23 mi striker hi Lewandowski thlaktu turin an hual leh der tawh a, Portugal lakah pawh dah san a nih chhan a pholang.
Piatek hian minute 18-na lekah goal hmahruai a khung a, ram tana match hnih a khelh vena chauh a ni! Genoa striker hian season duhawm tak a hmang mek a, Serie A club tan inelna hrang hrangah match riat khelin goal 13 a khung tling der tawh!
Chelsea leh Liverpool nena sawizawm hlawh mek striker hian seaosn hmasa kha chuan an ram club Cracovia tan a la khel a, season tluanin goal 21 a khung sak. Tunah erawh Italy-a ngaihven hlawh ber pawl striker a ni der tawh a, Portugal laka goal a khung bawk hi a mak lo.
Silva ve thung
Portugal-in minute 31-naah an si phurh an sut a, goal khungtu hi Piatek ang thoa tun hnaia 'form' tak Andre Silva a ni a, kum 22 mi striker-in ram tan match 29-a khelha goal 14 a khungna chiah a ni.
Silva hian season hmasaah AC Milan-ah beisei a phak lo a, Serie A match 24-a khelhah goal hnih chiah a khung - Europe striker beiseiawm ber pawla an sawi tan chuan beidawnna tham a ni a, tun season ṭan dawn khan Sevilla chu loan-in a pan.
Porto striker hluiin thutlukna a siam sual lo. Sevilla tan league match sarih a khelhah goal sarih a khung a, La Liga table-ah rin loh takin Sevilla hi hma a hruaipui mek - an hnuaiah Barcelona, Atletico Madrid leh Real Madrid te an awm!
Silva = Wow!
AS Monaco defender Kamil Glik-a'n Ligue 1 lama an club chet chhiat mek chu an ram team tan pawh a kalsan hleithei. Minute 42-naah an ram lamah a ti lut palh a, Portugal tan hmahruaina goal a khung sak.
Portugal-in an la duhtawk mai lo. Minute 52-naah Bernardo Silva chuan Portugal tan goal mawi bik a khung a, mikhual team hi awlsam takin an chak mai dawn niin a lang.
Mahse, Poland-in an duhtawk mai bik lo. Hun tawp nan minute 13 chauh a awm tawh tihah Jakub Blaszczykowski chuan a khung ve leh a, an phur thar. Mahse, goal dang khung leh tur em chuan hunin a daih ta lo a, an ramah an tlawm.
Mitrovic a kal zel
Nations League inkhel ngaihven hlawh dang zingah Serbia chuan 2-0 in Montenegro an hneh a, tun hnaia striker 'form' em em mai Aleksandar Mitrovic chuan goal hnih a khung.
Kum 24 mi striker hian penalty hmangin goal hmasa a khung phawt a, minute 81-naah goal hnihna a khung leh bawk - ram leh club tan tun season-ah match 10 khelin goal kua a khungna chiah a ni.
Yugoslavia hnuaia awm ṭhin ram pahnih hi ṭhen hran an nih hnua an intawn hmasak ber a ni a, venhimna pawh an uluk hle. Hetihlai hian he inkhel hi Manchester United boss Jose Mourinho chuan a hmunah a en ve bawk.
UEFA Nations League
Inkhel Result
League A
Poland 2 - 3 Portugal
League B
Russia 0 - 0 Sweden
League C
Israel 2 - 1 Scotland
Lithuania 1 - 2 Romania
Montenegro 0 - 2 Serbia
League D
Faroe Islands 0 - 3 Azerbaijan
Kosovo 3 - 1 Malta
Zanin Inkhel Tur
League A
Netherlands 12:15 AM Germany
League B
Slovakia 6:30 PM Czech Republic
Republic of Ireland 12:15 AM Denmark
League C
Norway 9:30 PM Slovenia
Bulgaria 12:15 AM Cyprus
League D
Georgia 9:30 PM Andorra
Latvia 9:30 PM Kazakhstan
Armenia 9:30 PM Gibraltar
FYR Macedonia 12:15 AM Liechtenstein