Monaco coach Jardim an ban
AS Monaco chuan an manager Leonardo Jardim chu a hna aṭangin an ban, a hmun ruak luah tur la puang chiah lo mah se Thierry Henry chu Ligue 1 club enkawl thei tura ngaih zinga langsar a ni.
Portuguese manager Jardim hian 2014 aṭang khan Monaco hi a enkawl ṭan a, 200 hnua an champion lehna hmasa ber turin 2017 khan league nomawi an chawi - Champions League semifinal an thleng hial bawk.
Kum 44 mi Jardim kaihhruaina hnuaiah Monaco hian hma an sawn tih a chiang a, chutihrualin an player neih ṭhat an chelh theih lo. Khawvel rawlthar duhawm bera chhal ngam forward Kylian Mbappe ngei pawh an elpui Paris St-Germain lakah an chan a ni.
Player ṭha an chhuah miau avangin Monaco tan ngaiawh leh a har a, hmasawn aia hnungtawlh lam an pan avangin manager chu a tuartu langsar a ni, tun season league match vawi kua an khelh tawhah point ruk chauh hmuin 18-na an ni mek.
Monaco chief executive Vadim Vasilyev chuan, "Leonardo chungah kan lawm, a hnathawhte avang khan kan zah takzet. He club tana a hun hman lai kha nakin zela sawi nuam kan tih ber turte zinga mi a ni ang. Ani hi chu Monaco chhungkua zingah a tel reng dawn," a ti.
A hna a chan hnuah Jardim chuan, "Kum li chuang Monaco manager ka ni thei hi ka lawm, ka theihna leh thiamna zawng zawng hlanin theihtawp ka chhuah a, ka sulhnu hnutchhiah tlemte hi ka hre reng tawh ang," tiin a sawi ve bawk.