En châkawm Electric Veng leh Ramhlun North

Electric Vengin match nga chhung chak loh an neih loh hnuah Chhinga Veng an hneh lo a, semifinal thleng tawh mai tura ngaih tawh chu an dinhmun a him ta lo.

Vawiin chawhma dar 11:30 hian MPL club thar Electric Veng hian Complex Field, Serchhipah Ramhlun North an hmachhawn dawn.

Ramhlun North erawh season ṭan hmain champion tumin player in la ṭha mah se beisei ang result an hlawh chhuak lo a. Coach thar Nicky Malsawmtluanga hnuaiah table mawngphah chhuahsan an tum ang.

Pehlawn zunzam

Electric Veng inkhel hnuhnung bera mipui mit la tak chu Pehlawn rawlthar Emmanuel Lalchhanchhuaha a ni.

Lammuala inkhel entuten Emmanuel-a che vel an la hmu kham lo a, Serchhip mipuiin Germany-a football zir tawh che vel hi an hmu thei dawn a ni.

A nung zel dawn

Electric Veng coach Vanlalsawma Colney chuan, "Lammual ang thoin inkhel nung tak Serchhip-ah pawh lantir kan tum a, kan theih ngei pawh kan ring," tiin Vanglaini a hrilh.

EFC hian hrem vangin midfielder Vanlalremdika (Tetea) leh inhliam vangin captain Laldinmawia te an la chhawi their dawn lo a. Hei vang hian Emmanuel-a, goal li khung tawhtu Isak Vanlalpeka leh H. Zawnhmingthanga ten mawhphurna an ngah sawt ang.

Mual sir lamah Lalhmangaiha damlohna vangin a khel thei dawn lo a, amaherawhchu Electric Veng tlangval hmunruak luah tur hian Ramhlunchhunga emaw M. Sawmliana te an la awm dawn tho.

Tlarhmaah David Lalchhuanawma a awm bawk a, Salem Veng tlangval hian goal li khung tawhin out and out striker chhuak thar ṭha tak a ni.

Beiseina thar

Ramhlun North-in team enkawl turin Nicky Malsawmtluanga an chang thei a, ani hi Aizawl FC Under 18 coach niin ADFA Second Division-ah a team enkawl a champion pui.

Club secretary Lalenghluna (Maenga) chuan, "Aizawl FC-in kan dilna min tih hlawhtlin sak avangin kan lawm hle. Coach thar hian beiseina thar min neih tir a ni," tiin Vanglaini a hrilh.

Ramhlun North hian player erawh an nei ṭha sa a, foreigner pathum John Ampong, Waheed Adekunle leh Musah Bamba bakah Mizo player ṭha an kawl.

Serchhipah hian Ramhlun North-in kum 2015 khan L&L Memorial Trophy nomawi an chawi tawh a, hlawhtlinna an chan tawhna hmunah point thum hlawhchhuah an tum ang.