Khabib-a'n UFC a vau

UFC lightweight champion Khabib Nurmagomedov chuan Conor McGregor nena an inbeih ṭuma Irish fighter kut lo thlaktu a ṭhianpa Zubaira Tukhugov chu UFC-in an hrem a nih chuan UFC a chhuahsan tur thu a sawi.

Ruahman dan chuan Zubaira Tukhugov hi October tawp lama Artem Lobov nena intawng tura tih an ni a, mahse he fight pawh hi 'cancel' a ni a, Khabib a lawm lo hle.

Russian fighter chuan, "Zubaira ban tur hian ngaihtuahna seng chhin teh u. Keipawh min chan ve nghal a ni mai. Team pahnih kha kan intibuai a, engvangin nge ka team chauh hrem a nih bik ang?" tiin zawhna a siam.

Las Vegas khawpuia buainaah khan Tukhugov hi octagon chhungah zuanglutin McGregor chu hnung lam aṭangin kut a thlak a, mahse video en let chuan McGregor hian a hmain kut a thawh hmasa zawk.

Kum 30 mi Khabib chuan, "Ka unaupa hi la hrem ṭalh in tum a nih chuan 'banna' contract min rawn thawn theihnghilh suh u. A nih loh chuanin keiman contract hi ka titawp ang. Video in en let chuan Conor khan ka unaupa kha kut a thlak hmasa zawk a ni," tiin a sawi.