India tan inkhel pawimawh - vawiinah China nen!

AFC Asian Cup 2019 khel tura inbuatsaih mek India chuan vawiin tlai dar 5 hian Blue Tigers chanchina match pawimawh tak an khel dawn a, China nen an intawng dawn.

Suzhou Olympic Sports Centre Stadium, Suzhou khawpuia inkhel tur hi Star Sports 1, 2 leh 3 ten live-in an pe chhuak dawn a, Mizo tlangval Jeje Lalpekhlua leh a ṭhiante inkhel kan en thei dawn tihna a ni.

India coach Stephen Constantine chuan, "He hmunah hian tlawm turin kan kal lo," tiin a lo sawi tawh a, zaninah a thusawia an din leh din loh a hriat ang.

China belchiang ila

Dragon tia hminglem an pek China hi FIFA ranking-ah 76-na an ni mek a, Italy coach hlui Marcello Lippi enkawlna hnuaiah awmin Asia khawmualpuia football ram ropui ber pawl nih tumin hma an la mek.

Kum 70 mi manager hian kum khatah pound maktaduai 18 a hlawh mek a, khawvela manager hlawh hnem ber a ni. Heta ṭanga chhut ringawt pawh hianin China-in hmasawn an tum tih a lang a, heti zat hlawh coach hnuaia India hneh loh an tum lo ang.

Juventus boss hlui hnuaia an result erawh beisei ang a la ni rih lo. Match 20 an khelh tawhah vawi ruk chiah an la chak a, vawi ruk inhnehtawkin vawi riat an tlawm. India an mikhual hmaa match hnuhnung berah Bahrain chu goal khung loin an inhnehtawkpui a, Bahrain hi Asian Cup-ah India nen group khatah an awmho dawn.

En bik tur

China tan tlarhmaah kum 32 mi Gao Lin chu player pawimawh a la ni reng a, ram tana match 100 khela goal 20 khung tawh striker hian Chinese Super League lamah pawh season duhawm tak a hmang mek a, match 23-ah goal 10 khungin assist vawi li a nei tawh.

Tun season CSL-a match 24-a khelh tawha goal 23 khung a, assist vawi kua nei thei Wu Lei hi sawi hmaih a thiang lo. Shanghai SIPG winger hi Sandesh Jhingan leh a ṭhianten ven dan an ngaihtuah a ṭul dawn tihna a ni.

Charlton Athletic leh Celtic tan pawha lo khel tawh Zheng Zhi hi kum 38 mi ni tawh mah se defensive midfielder ṭangkai a la ni reng a, tlarhnung laiah ram tana vawi 66 inlan tawh Zhang Linpeng leh Beijing Guoan rinrawl Yu Yang te an nei a, Sunil Chhetri leh Jeje Lalpekhlua te tan hna a tam dawn.

ISL vs CSL

China squad-a player te Chinese Super League club-a khel vek an ni a, Indian player zingah Indian Super League-a khel lo chu player pakhat chiah a awm bawk.

CSL leh ISL hi Asia mai ni lo, khawvela league ṭhangduang ber pawla sawi an ni a, tun dinhmuna a lan mai dawn chuan ISL aiin CSL hi a la chungnung zawk. CSL club ten khawvel huap pawha player langsar te an vanglai takin an lalut thei a, India-ah erawh an uaithlak tawh lamah a ni tlangpui.

Mahse, zanina a chianna tur erawh khawtual tlangval ten eng ang takin nge an ram football league ṭhang zel hi an chhawr tih hi a ni a, zanin inkhel tur hi ram pahnih inelna a ni satliah lo a, ram league ṭha zawk enna a ni nghal dawn.

Coach khaikhinna

Lippi leh Constantine hi khaikhin rual an ni lo a, India coach tan chuan Lippi hi chu cho rual loh a ni. Chutihrual erawh chuan coach pahnih hi an intawn dawn miau avangin khaikhin loh tawp erawh thil harsa a ni.

Italian coach-in kum khatah pound maktaduai 18 vel a hlawh laiin Constantine-a'n kum khata a hlawh zat chu £181,081.2 a ni a, India coach hian kum khatah China coach kar khat hlawh pawh a hlawh phak lo!

Coach pahnih hlawh a inthlauh tluk zetin an sulhnu pawh a inthlau. Lippi-a'n Italy chu World Cup nomawi a chawipui tawh a, Juventus chu Serie A (5) leh Champions League (1) nomawi a chawipui tawh bawk. Constantine erawhin nomawi sawi tur a la nei lo.

Thawnthu hlui

India tan China hi kawng engkimah an la sang zawk tih chu awlsam taka pawm tur chi a la ni rih. Team pahnih hi vawi 18 an intawng tawh a, China-in vawi 13 hnehna an chang tawh a, India la chak ve loin match ngaah an inhnehtawk.

Match 18-ah hian China-in goal 33 an khung a, India-in goal riat chiah an la khung thung. 1974 Asian Games kha India tlawm chian ber ṭum a ni a, 7-1 ngawtin an tlawm. Kum 21 liam ta Nehru Cup kha team pahnih intawn hnuhnung ber a ni a, China-in 2-1 in hnehna an chang - India goal neihchhun hi Bhaichung Bhutia khung a ni.

Vawiinah India-in Bhaching hmunruak luahtu tia sawi ve ve Sunil Chhetri leh Jeje an nei a, Indian legend tih angin China lakah goal an khung ve thei dawn em, tih chu a chiang thuai ang.

India Squad
Goalkeepers: Gurpreet Singh Sandhu (Bengaluru FC), Amrinder Singh (Mumbai City), Karanjit Singh (Chennaiyin FC).
Defenders: Pritam Kotal (Delhi Dynamos), Sarthak Golui (FC Pune City), Sandesh Jhingan(Kerala Blasters), Anas Edathodika (Kerala Blasters), Salam Ranjan Singh (East Bengal), Subhasish Bose (Mumbai City), Narayan Das ( Delhi Dynamos).
Midfielders: Udanta Singh (Bengaluru FC), Nikhil Poojary (FC Pune City), Pronay Halder (ATK), Rowllin Borges (NorthEast United), Anirudh Thapa(Chennaiyin FC), Vinit Rai ( Delhi Dynamos), Halicharan Narzary (Kerala Blasters), Ashique Kuruniyan (FC Pune City).
Forwards: Sunil Chhetri (Bengaluru FC), Jeje Lalpekhlua (Chennaiyin FC), Sumeet Passi (Jamshedpur FC),
Farukh Choudhary (Jamshedpur FC).

China Squad
Goalkeepers: Zeng Cheng (Guangzhou Evergrande), Yan Junling (Shanghai SIPG), Zhang Lu (Tianjin Quanjian).
Defenders: Zhang Linpeng (Guangzhou Evergrande), Feng Xiaoting (Guangzhou Evergrande), Li Xuepeng (Guangzhou Evergrande), Yu Hai (Shanghai SIPG), Liu Yiming (Tianjin Quanjian), Wang Tong (Shandong Luneng), Yu Yang (Beijing Guoan).
Midfielders: Zheng Zhi (Guangzhou Evergrande), Yu Hanchao (Guangzhou Evergrande), Zhao Xuri (Tianjin Quanjian), Jin Jingdao (Shandong Luneng), He Chao (Changchun Yatai), Piao Cheng (Beijing Guoan), Chi Zhongguo (Beijing Sinobo Guoan ), Wu Xi (Jiangsu Suning), Mirahmetjan Muzepper (Tianjin Teda).
Strikers: Gao Lin (Guangzhou Evergrande), Wu Lei (Shanghai SIPG), Xiao Zhi (Guangzhou R&F), Yu Dabao (Beijing Guoan).