Premier League nomawi inchuh boruak a hot leh ta ; Man City-in Kane an ngam lo, Reds an ṭha

'Liverpool-in Manchester City an hnaih thei ang em?' tih zawhna chhanna chu 'Aw, hnaih theih e' tih a ni.

Inrinni zan Premier League inkhelah Jurgen Klopp-a hoten Norwicty City 3-1 in an hneh a, Tottenham Hotspur-in champion lai Manchester City 3-2 in an hneh ve bawk.

Man City leh Reds inthlauhna hi point ruk chauh a ni a, Klopp-a hote hi match khata an khelh tlem avangin Premier League nomawi inchuh boruak a hot leh ta.

League match vawi thum a zawna chak tawh lo Spurs-in Etihad Stadium-ah point thum hlu tak an hlawh chhuak a, Harry Kane a langsar hle. London club tana Dejan Kulusevski leh Kane te goal khung chu Ilkay Gundogan leh Riyad Mahrez hmangin mualneituin an sut.

Pep Guardiola hoten si phurh an sut hian injury time ni tawh mah se Conte hoten hnehna an chang tho - hun pek belh minute nganaah Kane-a'n chakna goal a tauh lut.

Liverpool-in Norwich lakah goal chhuah hmasa mah se Sadio Mane, Mohamed Salah leh Luis Diaz-te hmangin hnehna an chang. Mane bicyle kick a mawi a, Salah goal a class bakah Reds tana Diaz goal hmasa ber a tawih em em bawk.

Coach ṭha inbeihna
Man City leh Spurs inkhel hi club lian inkhel a ni satliah lo. Pep-a hote tan nomawi humhim turin chetsual a pawi a, London club tan season thara Champions League khel turin point hloh a thiang lo. Team pahnihin khelmual pawnah pressure an nei ve ve a, coach ṭha chungchuang pahnih inbeihna a nih avangin inkhel hmuhnawmna belhchhahin a awm.

Kar laihawl aṭangin Conte-a'n 'thluak game' a khel ṭan tawh a, Man City hmachhawn turin a team-te tuai hriam hlarh mah se pressure tihtlem nan January transfer an hman ṭhat loh thu leh player a neih ṭhat tawk loh thu a sawi.

An rilru zawng zawng erawh Etihad Stadium lamah a awm tih an khelh danah a lang a, player tinin an khelh dan an bel. Chutiang bawkin league hmahruaitu Man City-in an khelh dan an bel a, rinlawk ang ngeiin inkhel thunun zawktu an ni.

Kane-a Show
Spurs-in ball chan tlem an pawi ti lo a, amaherawhchu goal venhim ngawr ngawr tum loin Man City vuak let dan tur an zawng pah reng. Minute lina lekah Conte hoten training ground-a zir ang thlapin an vaw let.

Man City-in pressure ṭha taka an pe chungin Spurs-in an vaw let thei tho - player mala an ṭhat vang a ni tel. Vei lam aṭangin Ben Davies-a'n Kane a pe a, English forward hian vawi khatah Son Heung-min tana duhthusamin through ball a pe a, Son hian amah thlawptu Kulusevski pe lehin Sweden international hian goal hmahruai a khung.

Spurs-in tlarhnung an rem phui ṭha a, striker mal tlat Kane pawh midfielder chetna tur velah a awm tawh a, player dang zawng chu defender-a chhal theih a ni. Heti chung hian Man City-in an class an pholang a, Joao Cancelo leh Gundogan te hmangin goal hmaah an hlauhawm hle.

Mualneitu hian minute 33-naah Gundogan hmangin an phu angin si phurh an sut bawk. Spurs-in first half-ah goal an chhuah tawh lo a, halftime-ah Conte hnen aṭangin thu ṭha an dawng. Minute 59-naah Son-a ball vawrh luh chu Kane-a'n goal-ah a chantir a, England captain hian striker hriam bik a nihzia lantirin goal khung tur hian a tlan thui a, a finishing a ṭha bawk.

Spurs-in City tlarhnung an ṭhiat a, a hunah tak a hmunah Kane awm leh mah se goal-ah a chantir lo. Man City pawhin an nawr ve reng a, box pawn aṭanga Gundogan-a ball pet ṭha zet chu keeper Lloris-a'n a dang ṭha hle.

Kane-a'n minute 74-naah goal a khung a, amaherawhchu ball petu Kulusevski offside vangin an pawm lo. Man City an vannei a, injury time-ah Cristian Romero handball vangin penalty an hmu a, Mahrez-a'n si phurh sut nan a hmang.

Inkhel hmuhnawm bikah chak zawk an awm dawn lo niin lang hman mah se injury time-ah pawh minute nganaah Kulusevski cross chu Kane-a'n a tauh goal. Spurs-in 3-2 in hnehna an chang a, a changtupa chu Kane a ni.

Boruak a dang ta
Man City hian nipui bazarah Kane lak tumin Spurs an dawr a, English forward hian Etihad Stadium pan a duh. Premier League ṭan niah Spurs-in Kane tel loin Man City hi 1-0 in an hneh tawh a, London ṭantute au hla chu "Kane, i lo hmu em?" tih a ni.

Amaherawhchu Spurs hian an player chhuanvawr hi chhuahtir an phal lo a, Man City-in euro maktaduai 150 leh 'add ons' thlenga an ngam chung pawhin inbiakna an kalpui duh lo. London club-in sum ṭhahnem tak an hnawl a, a rah an seng.

Tunah chuan Spurs ṭantute pawhin "Harry Kane, kan zinga mi ngei a ni," tiin an au tawh zawk.

Kane ropuinain a thlen tak chu Premier League nomawi inchuh boruak a hot phah. Man City hi an hnuaia awm Liverpool ban phakah an awm tawh. Reds hi inelna hrang hrangah match riat chhung an chak zawn tawh a, inrintawkna an ngah hle.

Liverpool hian February 23, Nilaini zanah Leeds United an mikhual ang a, Anfield-ah point thum an hlawhchhuah chuan Man City nena an inkar hi point thum chauh a ni tawh dawn. Team pahnih hi April 9-ah an la inkhel dawn bawk a, Premier League a hmuhnawm leh ta sawt.

Eng nge an sawi?
Match thum an chak loh zawn avangin thawhchhuah an tum dawn tih kan hria. Goal venhim tumin hmun awl min pe lo. Ball an chanin min vaw let turin Kane an nei a, tlan turin Son an kawl. A nihna tak chuan kan khel ṭha a, chak tumin bei mah ila kan hlawhtling ta lo a ni.
- Pep Guardiola, Man City

Man City hmachhawn chuan ball possession 70% an chang thei tih kan hria a, chuvang tak chuan goal venhim a ngai. Goal hmasa ber kha a ṭha a, training ground-a kan zir a hlawhtling. Hun tawp dawna goal kha hnual hnawkna tham a ni a, mahse ka naute khan chak an thlang ta zawk. Ball kan chan apiang khan goal-ah kan hlauhawm. Tuna hnehna kan chan hian inrintawkna min pe ngei ang.
- Antonio Conte, Spurs manager zinga Etihad Stadium-a hnehna chang hmasa ber