F1 champion hnem ber Hamilton Michael Schumacher a nih rual

Lewis Hamilton chuan Turkish Grand Prix-ah hnehna changin Formula 1 title a kawl lai a humhim. Car intlansiakna sang berah hian vawi sarih a champion tling ta a, champion hnem ber Michael Schumacher (7 titles) a nih rual chiah bawk.

Mercedes driver hian F1 inelnaah hian vawi 94 ngawt hnehna a chang tling ta bawk a, intlansiak mala hnehna chan hnem lamah pawh a chungnung ber. Vawi 92 chak thei German legend Schumacher chu a lo khum tawh bawk a ni.

Nimin tlai Istanbul Park a intlansiakah Hamilton hian awlsam takin hnehna a chang mai bik lo, a hnufual lai chuan paruknaah te a awm hman hial - a hmaah hian a hmasa ber aṭanga tlan ṭan Sergio Perez leh a elpui ni ṭhin Sebastian Vettel te an awm.

Mahse nidang ang bawkin Britain tlangval hian a theihna san bikzia a lantir leh a, lap 58 an tlan zawh meuh chuan a hmasa berah a thleng. Amah hnaih bertu Perez aiin second 30 chuang zetin a tlan fel leh hman a ni.

Tun season intlansiak 14 awm tawh aṭangin Hamilton hian vawi 10 ngawt hnehna a chang thei a, point 307 nei tawhin inelna neih hmabak pathum la awm mah se amah hnaih bertu Valtteri Bottas (197 points) tan umphak theih a ni tawh lo.

Qualifying lamah Hamilton a che fuh tawk lo a, parukna aṭangin intlansiak bul a ṭan phak chauh. Tlan kawng a huh deuh avangin chetsual palh theihna kawng a inhawng zau viau a, motor ke (tyre) tih chhiat palh chu hlauhawm tak a ni.

Tlankawng huh mah se Hamilton a che sual duh lo, dawhthei takin a tana hun ṭha inherchhuah hun a nghak. Lap 37-na an tlan chuan hmahruai turin a dinhmun a siamṭha thei tawh a, tlan kawng pawh ro chho zelin a tan hun duhawm a inherchhuak zui bawk.

Mercredes driver pakhat zawk Bottas tan a teammate in nomawi a la tur hi dan theih a la ni, point riat a hmu tling a nih chuan a la chelh theih. Mahse, Bottas hian beisei phak loin 14-na dinhmun a luah phak hram a, atan Britain tlangval dan theih a ni lo.