A club hlui lakah Zohera a che ‘hero’

NorthEast United right back Joe Zoherliana'n a club hlui Bengaluru FC lakah a theihna a pholang a, Zirtawpni zan khan NorthEast hian 2-1 a Bengaluru hnehin Zohera hi hero of the match-ah thlan a ni.

Bengaluru hian Cleiton Silva hmangin goal hmahruai khung mah se Highlander-in Deshorn Brown leh Laldanmawia Ralte hmangin an chhanglet a, 2-1 in inkhel a tawp.

Highlander si phurh sutna goal a luh theih nan Zohera'n duhthusama ṭhain Brown tan ball a thlawh lut a, Jamaican striker tan hlah chi a ni lo - Zohera siamsak tho Imran Khan -a'n first half-a a khung lo pawh uiawm tak a ni.

Mizoram Premier League pûm chhuak Zohera chuan, "Hero of the match nih ka inring lo a, rin loh takin min thlang a, nuam tak a ni - Bengaluru lakah kher a ni hian a nawmna a belhchhah," tiin Vanglaini a hrilh - season hmasa khan Bengaluru zawm mah se a inlan miah lo!

Lengpui tlangval chuan, "Ka season hman danin duhthu sam lo mah se ka lawm tawk a, kan club season hman ṭhat tawk loh chhan chu player inhliam kan neih reng vang a ni ber," a ti bawk.

'Sialhawk Express' Dan-mawia'n minute 80-naah chakna goal a khung bawk a, Marcelinho-a'n Bengaluru defender a lam khum hnua a siamsak chu Mizoram Premier League season hmasa bera best player hian goal-ah a lo chantir.

Danmawia hian tun season-ah league match 11 khelin goal thum a khung tawh a, assist vawi khat a nei bawk.

Inrinni zan khan ISL-ah inkhel pahnih a awm bawk a, Kerala Blasters-in Adrian Luna hmangin vawi hnih ngawt hma hruai mah se ATK Mohun Bagan-in David Willaims leh Joni Kauko hmangin an chhanglet a, 2-2 in an inhnehtawk.

Blasters tan minute 90 khel tluantu K. Lalṭhathanga'n (Puitea) goal khungna hun ṭha zet nei mah se Bagan keeper Amrinder Singh chuan a lo dang a, woodwork a per - Blasters goal hnihna hi Puitea siamsak a ni.

Inrinni zan inkhel hnuhnung zawkah Hyderabad FC chuan 3-2 in FC Goa an hneh a, Bartholomew Ogbeche chuan Hyderabad tan goal hnih khungin ISL-a goal 51 khung tling hmasa ber a ni.

Ogbeche bakah Joao Victor chuan Hyderabad tan a khung bawk a, Goa-in Jorge Ortiz leh Devendra Murgaonkar hmangin goal khung ve mah se awmzia a nei lo a, ISL semifinal an khel dawn lo tih a chiang zui.