Club World Cup champion tan Ziyech

Chelsea-in Club World Cup champion zawha an match hmasa berah Crystal Palace an hmachhawn a, Selhurst Park-ah Hakim Ziyech-a goal hmangin 1-0 in an chak hram.

Inrinni zan inkhelah Palace keeper Vicente Guaita a khel ṭha a, N'Golo Kante leh Antonio Rudiger te goal khung tur a dang. Guaita hi a inhliam vangin second half-ah Jack Butland a rawn inlan.

Chelsea-in goal chance siam an harsat a, Romelu Lukaku-a'n ball ṭha a hmuh lo a, striker man to hian open play-ah ball vawi ruk chiah a khawih!

Moroccan midfielder Ziyech-a'n Butland-a save per chu goal-ah a chantir a, Lukaku offside vangin an pawm lo. Minute 89-naah erawh sawisel theih lohin a khung - vei lam aṭanga Marcos Alonso cross chu Ziyech-a'n a volley goal.

German manager Thomas Tuchel chuan, "Khaw lum (30C) hnuaiah minute 120 kan khel zo chiah a, kan zin chauh bawk avangin beisei san chi kan ni lo. Kar li chhung Premier League kan khelh tawh loh hnuah kan inkhel leh a nia, a mak angreng hle," tiin an khelh ṭhat tawk loh chhan a sawifiah.

Chelsea hian point thum hlu tak an hlawh chhuah avangin point 50 an hmu a; point hnih hloh ta zawk chu ni se season thara Champions League khelh inchuh zinga a buai pawlah an tel thei ang.

Blues hian February 22, Thawhlehni zan hian Champions League last 16-ah French champion Lille chu Stamford Bridge-ah an mikhual dawn.

UEFA hnuaia inelna dan tharah away goal rule a awm dawn lo a, chutih rualin khualmualah second leg khelh a nih dawn avangin Blues tan mahni muala chak hi a pawimawh dawn.