Arsenal chakna Smith Rowe leh Saka
Emile Smith Rowe leh Bukayo Saka te goal ṭha tak hmangin Arsenal chuan an mikhual Brentford 2-1 in an hneh. Gunners hi Premier League table-ah parukna an ni a, an khelh tlem bikna an khelh kim huna an chak a nih chuan palina an ni dawn - Champions League rim a nam.
Inrinni zan Premier League inkhel dangah, palina nih tuma Arsenal elpui West Ham chu an mikhual Newcastle United nen 1-1 in an inhnehtawk. Hammers tan point hloh a uiawm a, Magpies erawhin season thara EPL khel chhunzawm turin an dinhmun an sawhnghet zel.
Laipui a puak
Premier League season ṭan ni khan Arsenal hi Brentford mualah an lenglut a, fans puihna dawng ṭha tak Bees hian 2-0 a lo hnehin North London club an barakhaih, nipui bazara sum hmang hnem Gunners hian sawisel an hlawh chhunzawm nasa hle.
Mikel Arteta-a'n a player lei tharte a chhawr thiam tawh a, tunah chuan boruak a danglam ta. Hrem vangin Gabriel Martinelli a inlan thei lo, a aiawha lut Smith Rowe-a'n ball naran a hmuh chu box chhungah la lutin goal mawi a khung.
Smith Rowe ang bawka Hale End chhuak Saka hun a inher chhuak ve bawk. Counter attack hmangin an vaw let a, midfielder Thomas Partey-a ball pek a dawn chu tlan paha insiamrem puiin goal kilah a pet lut pawp. Hun tawp dawna Christian Norgaard goal khungin awmzia a nei phak lo.
Arteta a lawm
A naute khelh danah Arsenal manager Mikel Arteta a lawm a, a bik takin a tir lama an goal nawr dan chuan a tih lawm thu a sawi. Arteta chuan, "Lawmna tur tam tak a awm, chung zingah chuan kan ruahman anga kan khel thei kha a tel.
"Dawhthei takin kan nghak a, hun pawimawhah Emile a rawn inlar, ani khan hna a tiawlsam ta hret. Khel ṭha mah ila famkim vek erawh a ni lo, set piece aṭangin goal kan chhuah, thil thleng kha kan ennawn leh ang," tiin a sawi.
Hun tawp dawna goal lutah line referee chuan flag a phar, mahse VAR hmanga ennawn a nih hnuah an pawmsak. Gunners hian set piece coach Nicolas Jover hnuaiah hma an sawn; EPL season kal laiah corner aṭangin goal an la chhuah lo.
Hammers an chelh
David Moyes kaihhruai West Ham hian Champions League khelh an tum ngam a, mahse an hmaah harhtharna chang Newcastle an din miau avangin point khatah an lungawi a ngai, palina nih phak a ti harsa sawt ang.
Mikhual tana Craig Dawson tauh luh chu chawlhlawk hma chiahin Joe Willock-a'n a sut, second half-ah goal dang a lut zui tawh lo. Hammers hi pangana an ni mek a, an hnuaia awm Arsenal leh Tottenham aiin match thum ngawtin an khel hnem.
Eddie Howe-a'n Newcastle a enkawl tirh khan a match hmasa pariatah vawi khat chiah an chak, mahse tunah erawh an khelh hnuhnung panga aṭangin vawi thum an chak, tunah pawh player pawimawh Kieran Trippier leh Allan Saint-Maximin tel loin point an hmu thei.
Beisei phak lo
Everton tan manager Frank Lampard an neih hnuah lawmna tur teh vak a la awm lo. Lampard-a naute hi Southampton chuan Stuart Armstrong leh Shane Long te goal hmangin 2-0 in an lo hneh.
Lampard chuan, "Hmasawnna hmuh tur a la awm hleithei lo hi a mak, point mamawh tak dinhmuna awm laiin khualmualah kan che fuh thei tlat lo," a ti. An match lehpek atan Manchester City an mikhual dawn, point hmuh a harsa mai thei.
Goodison Park-a an match hnuhnung pahnihah chuan Everton hi an khel ṭha, goal sarih khungin anmahni lamah goal khat chiah a lut. Khualmuala an match hnuhnung pahnihah erawh goal nga chhuahin goal khat chiah an khung ve thung.
An tal chhuak
Table mawngphah luahtu ni reng Burnley chuan Brighton & Hove Albion 3-0 in an luh chhuah a, season kal laia vawi hnih an chakna chauh ni mah se a hniam ber dinhmun an chhuahsan - a him china awm Newcastle an phak lohna erawh point nga lai a ni.
Burnley tan hian Wout Weghorst-a'n minute 21-naah goal hmahruai a khung, a club thar tan match li a khelh aṭanga a goal hmasa ber a ni. Josh Brownhill leh Aaron Lennon ten khung belh bawkin point thum hlu tak an hlawh chhuak.
Burnley manager Sean Dych chuan, "Weghorst lakah beiseina kan nei sang, boruak thar a rawn hip khan a tirah a awlsam vek bik lo. Tunah erawh a hna ngai goal khung a chhunzawm ngei kan beisei," tiin Wolfsburg aṭanga an lakluh striker chungchang a sawi.