Qatar Open champion Bautista Agut

Inrinni zana khelh zawh tak Qatar Open final-ah Roberto Bautista Agut chuan champion lai Nikoloz Basilashvili chu straight set hmangin a hneh a, tennis a khelh hun chhunga title 10 a vuak chhuah tlinna chiah a ni.

Spain tlangval Bautista Agut hi tun dinhmunah world number 16 a ni a, champion tura rinkai ber a ni lem lo. Mahse, nikum lama Doha Championship-a a ngam loh Basilashvili hi 6-3, 6-4 a hneh let chungin a champion.

Kum 33 mi Bautista Agut chuan, "Nomawi ka chawi lohna a rei tawh hle a, tunah chuan rim taka ka thawh chu a lawmman ka hmu ve leh ta," a ti. Kum 2019 hnua a vawi khat nan nomawi a chawi ve leh chiah.

Bautista Agut chuan sawi zawmin, "Doha-ah hian hlawhtlinna ka chan vawi hnihna a ni a, ka tan chuan hmun hlu bik a ni. Tennis ka khelh loh hnu thlengin he hmun hian ka nunah hmun pawimawh a chang dawn," a ti.