Ostapenko a thiam ber

Hmeichhe tennis khel thiam langsar tak tak telna Dubai Tennis Championship-ah Jelena Ostapenko a thiam ber. French Open champion hlui hian Veronika Kudermetova chu 6-0, 6-4 a hnehin a champion.

Inrinni zan final inkhelah Ostapenko a khel ṭha hle, set hmasa zawkah phei chuan game a hloh miah lo. A khingpui Russian nula hi darkar khat chhung vel chauhin a hneh a, harsatna lian tham a tawk miah lo.

Kum 24 mi Ostapenko hian final kalkawngah hian - Sofia Kenin, Iga Swiatek, Petra Kvitova leh Simona Halep te a hneh. Grand Slam champion thei player pali ngawt a paltlang tihna a ni, a kalkawng a hautak hle.

Latvian nula Ostapenko chuan, "Ka khel ṭha ve tawk hleah ka ngai, kar tluanin ṭha takin ka khel thei a, a tawpah nomawi hlu tak ka chawi. Player ṭha tak tak kara hlawhtlinna ka chang thei hi a hlu zual," tiin a sawi.